Sjå børstabell for Nordvestlandet under saka
Store delar av tysdagen skjedde det lite spennande i børsmarknaden sett frå Nordvestlandet.
Men ein halvtime før stengetid melde Havila Kystruten at dei hadde overtatt dei to skipa Havila Polaris og Havila Pollux – og brått var aksjen mellom dagens vinnarar på Oslo børs.
Aksjen endte opp 9,22 prosent i løpet av dagen, til 1,13 kroner aksjen.
Kursen var førre veke oppe i over to kroner, men kollapsa til rett under emisjonskursen på ei krone på slutten av veka.
Trøbbel for torskeoppdrett
Kort tid etter stengetid kom også Statt Torsk med ei melding om fleire utfordringar med torskeoppdrettverksemda.
Selskapet har opplevd auka dødelegheit mellom torsken deira på Stokkeneset i juni og juli.
Situasjonen er ifølgje selskapet tilbake til normalen, men årsaka er ikkje klarlagt, ifølgje børsmeldinga.
Samla tap på 12 millionar
Dei økonomiske tapa som følgje av auka dødelegheit, blir anslått til 4,5 millionar kroner - men vil ikkje påverke sal og leveransar som er inngått til august 2024.
Ved Refvika-anlegget blei det slakta 2920 tonn rundtorsk i juni – rundt 280 tonn mindre enn venta. Tapa som følgje av lågare slaktevolum er anslått til 7,5 millionar kroner for selskapet.
Aksjen for oppdrettsselskapet stod tysdag stille og kursen er på 0,55 kroner.
Hovudindeksen på Oslo børs var også tilnærma uendra på slutten av dagen, med ein oppgang på 0,05 prosent til 1.245,5.
Flaggseremoni i Tyrkia
Havila Kystruten opplyser at overtakinga av skipa deira skjedde under ein offisiell seremoni på Tersan-verftet i Tyrkia tysdag ettermiddag.
– Ein merkedag for reiarlaget, uttaler administrerande direktør Bent Martini i ei pressemelding.
Havila Polaris skal i rute frå Bergen 17. august, og vil vere først av kystruteskipa til å sette kursen mot Norge.
Deretter slår Havila Pollux følgje, som skal ut på sin første Bergen-Kirkenes-seglas få 23. august.
Børstabell for Nordvestlandet:
| Ticker | Selskap | Kurs i kroner | %-endring i dag |
| Havila Kystruten AS (XOSL:HKY) | Havila Kystruten | kr 1,13 | 9,22 % |
| Hofseth Biocare ASA (XOSL:HBC) | Hofseth Biocare | kr 3,09 | 4,75 % |
| Salmon Evolution ASA (XOSL:SALME) | Salmon Evolution | kr 6,87 | 1,93 % |
| Hexagon Composites ASA (XOSL:HEX) | Hexagon Composites | kr 30,74 | 1,39 % |
| Hav Group ASA (XOSL:HAV) | Hav Group | kr 10,25 | 0,99 % |
| Hexagon Purus ASA (XOSL:HPUR) | Hexagon Purus | kr 20,80 | 0,48 % |
| Golden Energy Offshore Services AS (XOSL:GEOS) | Golden Energy Offshore Services | kr 1,23 | 0,33 % |
| Nortel AS (XOSL:NTEL) | Nortel | kr 26,80 | 0,00 % |
| Statt Torsk ASA (XOSL:STATT) | Statt Torsk | kr 0,55 | 0,00 % |
| Sparebanken More (XOSL:MORG) | Sparebanken Møre | kr 76,30 | -0,26 % |
| Norva24 Group AB (publ) (XSTO:NORVA) | Norva 24 Group* | 26,55 kr | -0,93 % |
| Endur ASA (XOSL:ENDUR) | Endúr | kr 39,20 | -2,00 % |
| Atlantic Sapphire ASA (XOSL:ASA) | Atlantic Sapphire | kr 6,02 | -2,27 % |
| Havila Shipping ASA (XOSL:HAVI) | Havila Shipping | kr 12,28 | -2,54 % |
| Eqva ASA (XOSL:EQVA) | Eqva (tidl. Havyard Group) | kr 2,76 | -3,83 % |
| Arctic Bioscience AS (XOSL:ABS) | Arctic Bioscience | kr 9,64 | -10,33 % |
| * Kurs i SEK | |||
Publisert: 01.08.2023 16:06
Sist oppdatert: 01.08.2023 17:02
