Betalte over milliarden

I januar i fjor kjøpte Tore Roaldsnes sitt nye fiskeriselskap Bluewild den 74,4 meter lange frysetrålaren Volstad frå Eivind Volstad-selskapet Volstad i Ålesund.

Partane opplyste at det hadde vore jobba med kjøpet i snart eitt år. Adm. dir. Tore Roaldsnes i Bluewild sa at kjøpet skulle legge grunnlaget for å byggje opp eit sjømatselskap fokusert på berekraftig fiskeri, 100 prosent ressursutnytting og ombordproduksjon.

Styreleiar Eivind Volstad i Volstad-reiarlaget meinte det var gledeleg at det vart ein lokal kjøpar, noko som betydde at både arbeidsplassar og verdiskaping vart verande i distriktet.

1037,7 millionar
Men også prisen var truleg gledeleg for Volstad.

Årsrapporten for selskapet viser nemleg at båt med kvoter, inkludert to strukturkvoter, vart seld for 1037,3 millionar kroner.

Frysetrålaren vart bygt ved tyrkiske Tersan i 2013, og driv hovedsakleg tråling etter kvitfisk og reker.

Skipet hadde ved overtaking 21 tilsette for kvart skift.

Trålaren heiter no Ishavet, og er torsdag på fiske i Barentshavet. I tillegg har Bluewild trålaren Langenes.

Har bestilt ny trålar
Reiarlaget har også bestilt ein ny trålar til omlag 600 millionar kroner for levering frå Westcon i slutten av 2023. Ombord blir det mellom anna ein fabrikk som skal filetere og kutte fisken i porsjonsstykke.

Fisken blir frosen og pakka ombord, slik at den kan pakkast om i forbrukarpakningar på land.

Både levering og ompakking vil skje på Bluewild sitt eige anlegg på Flatholmen i Ålesund, eventuelt ved levering til andre anlegg i Noreg eller Europa, har Roaldsnes opplyst til NETT NO.

Båten skal fiske både kvitfisk og reke. Planen er deretter å selje Langenes, ein båt Roaldsnes forventar å få rundt 50 millionar kroner for.

Godt med kapital
Volstad-reiarlaget har dermed ingen skip igjen, etter at selskapet først valde å selje seg ut av offshore.

Men selskapet har kapital etter salet av trålaren.

Eigenkapitalen er på 532,8 millionar kroner, og den langsiktige gjelda på 203,5 millionar.

Volstad er eit heileigd dotterselskap av Volstad Shipping, og har etter sal av båt og kvoter bidrege med 297,0 millionar kroner i ekstraordinært utbyte, i tillegg til 118,7 millionar i konsernbidrag.