Brødrene Aa-båtar er «Ship of the Year» i Hellas

Dei tre hurtigbåtane Brødrene Aa leverte til det greske reiarlaget Attica Group er kåra til «Ship of the Year» i ei kåring Lloyd’s List utfører.

Storkontrakten på tre båtar i karbonfiber med splitter nytt design, hadde ein trangare fødsel enn dei fleste. Avtalen med det greske selskapet Attica Group var så godt som klar til signering tidleg i mars 2020, men blei utsett til starten av 2021 på grunn av koronapandemien.

Kontrakt til 220 millionar
I september feira representantar for verft og reiarlag dåp av dei nye båtane i utkanten av Aten. Verdien på kontrakten var på kring 220 millionar kroner.

Attica Group sitt dotterselskap Hellenic Seaways står for drifta av båtane ved Dei saroniske øyane, og nyvinningane er teke godt i mot av dei reisande.

Første kunde på nytt design
Attica Group er første kunden som kjøper båtar med det nye Aero-designet frå Nordfjord-verftet.

Ifølgje verftet representerer dei ein ny standard, både for kundane og miljøet. Katamarankonstruksjonen i karbonfiber er svært lett, noko som gjer at båtane får mindre luftmotstand og brukar mindre drivstoff. ,

Båtane er 36 meter lange, har plass til 150 passasjerar og har ei toppfart på 34 knop.