![Hans Petter Hildre NTNU foto Marius 11](/imager/images/2197779/Hans-Petter-Hildre-NTNU-foto-Marius-11_859d8f71e51cdcc79197ecd3648d156c.webp)
Bygger fagmiljø for smartare produksjon
Masseprodusert skreddarsaum høyrest ut som ei sjølvmotseiing. Det er målet for eit nytt NTNU-senter.
Onsdag hadde det nye Gemini-senteret ved NTNU Ålesund sitt første fagseminar ved Sundebygget med ein rekke inviterte gjestar. Senteret skal bidra til å utvikle eit sterkare miljø for det som blir kalla kundetilpassa produksjon.
Jo Strandhagen er koordinator for senteret og fortalde at nyvinninga er ein modell for å jobbe saman for å skape meir robuste fagmiljø.
– Målet er å bli enda betre ved å jobbe saman på denne måten, fortalde han.
Det nye Gemini-senteret skal både vere ein arena for deling av kunnskap. Samtidig skal dei arrangere årlege fagseminar og peike på nye aktuelle forskingsaktivitetar.
![NTNU Geminisenter foto marius 11](/imager/images/2197789/NTNU-Geminisenter-foto-marius-11_452393f9122041e91205caa465b1472b.webp)
Digitalisering gir større moglegheiter
Kundetilpassa produksjon dreiar seg om korleis kvart enkelt produkt kan bli tilpassa kunden sine ønsker og behov.
«Masseprodusert skreddarsaum», kalla Strandhagen metoden – som kan høyrest ut som ei sjølvmotseiing. Auka digitalisering er mellom utviklingstrekka som gjer det enklare å ha tilpasse produksjonen på denne måten.
– Teknologien gjer det mogleg å drive produksjon i eit høgkostland som Norge, påpeika Strandhagen.
Stort potensial for fleire bransjar
Potensialet for kundetilpassa produksjon er spesielt stort innan skipsbygging, olje- og gassindustri og maritim industri. Samtidig er det eit aukande behov innan alt frå helseindustrien til møbelproduksjon.
Det kan også vere stort potensial i fiskeindustrien – der ulike kundar gjerne vil ha ulike delar av fisken og ulik kvalitet.
Det nye Gemini-senteret er eit samarbeid mellom Sintef Digital, institutt for havromoperasjonar og byggteknikk i Ålesund og institutt for maskinteknikk og produksjon i Trondheim.
Les meir om senteret (ekstern lenke)
Publisert: 13.12.2023 15:06
Sist oppdatert: 13.12.2023 15:06