Byggjer praktbygg - starta i brakke

- Det kjem til å pynte heile bygda, seier ei begeistra Liv Vadset Walderhaug i Tennfjord etter ha høyrt Håvard Sætre i Vard Electro presentere planane for nytt hovudkontor for Vard Electro for bygdefolket saman med Snøhetta-arkitekt Rune Grasdal i dag, torsdag 22. mai. Ho blir næraste nabo til det nye hovudkontoret.
I beste fall står første byggjetrinn klart sommaren 2016, i verste fall seinhausten same år.

Over 850 tilsette

Haram Elektro, som Sætre starta i 1997, er i dag blitt Vard Electro, med over 850 tilsette - i Noreg, Romania, Vietnam, Singapore og Brasil. Driftsinntektene er på 1,3 milliardar kroner i året, og eigaren, Vard, er den dominerande kunden.
No skal dei tilsette på Sunnmøre samlast i eitt anlegg, i Tennfjord, der det heile starta. Målet er mellom anna å hente ut ein gevinst ved å ha alle samla på ein plass.
Får Sætre den veksten han vonar på kan bygging av andre byggjetrinn, som gjer at det nye hovudkontoret blir verkeleg oppsiktsvekkande, starte samstundes som første byggetrinn står ferdig.

Signalbygg

Håvard Sætre legg ikkje skjul på at anlegget skal bli ei signalbygg, som blir så attraktivt og oppsiktsvekkande at det skal sikre at folk frå dei ulike avdelingane - mellom anna frå Ålesund - vel å bli med på flyttelasset til Tenfjord i 2016.
- Vi skal tiltrekke oss spisskompetanse i området her. Både utvendig og innvendig skal det vere noko som det er kjekt å møte opp til, seier Sætre.
Store deler av dagens bygningsmasse Vard eig i Tennfjord sentrum (Johangården), skal pussast opp og byggast om. Nokre hus skal rivast, og i byggetrinn to skal de byggast eit langt, slankt bygg med mange vindauge og med form etter eit stilisert skipsskrog, plassert oppe på den eksisterande bygningsmassen.
280 tilsette vil ha sin base i Tennfjord, medan sjølve bygget (første trinn) vil romme 120 kontorarbeidsplass og og 40 arbeidsplassar i produksjon og lager.

Vann konkurranse

Det verdskjende arkitektfirmaet Snøhetta vann oppdraget med å teikne hovudkontoret.
- Snøhetta vann både på design og pris, seier Sætre.
- Ei fantastisk utsikt, og eit uforløyst potensiale, seier Rune Grasdal i Snøhetta om bygget og tomta.
Med operaen i Oslo og minnebygget etter terror-åtaket på World Trade Center i USA på lista over oppdrag, er det ikkje så rart at Snøhetta har tru på signalbygg.
- Eg trur at for ei bedrift er det identitetsskapande å ha eit bygg som blir lagt merke til, seier Grasdal.

Vil bli stor hos Fincantieri

I dag står Vard-verfta for rundt 90 prosent av driftsinntektene til dotterselskapet Vard Electro.
Sætre seier at Vard Electro er i forhandlingar med største aksjonær i Vard-konsenet, den italiensek verftsgruppa Fincantieri, som mellom anna er stor på byggjing av cruiseskip.
Klarer Vard Electro å få same gjennomslag hos Fincantieri som hos Vard er det snakk om ei dobling av driftsinntektene. Det vil først og fremst slå ut hos Vard Electro i utlandet.
Men når Sætre det andre målet, å utvide kundegrunnlaget for den norske verksemde i Vard Electro, blir det behov for meir plass i Tennfjord.