Børsdagen: Får svi for produksjonstap

Saka er oppdatert med børstabell for Nordvestlandet etter handelsslutt.

Statt Torsk fekk svi då børsen opna onsdag og aksjen sank frå start.

Reaksjonen kjem etter at selskapet etter stengetid tysdag melde om auka dødelegheit ved eitt anlegg og lågare slaktevolum enn venta ved eit anna anlegg.

Ved 13-tida var aksjen ned 10,44 prosent til 0,49 kroner. Botnnoteringa for aksjen er på 0,42 kroner frå tidlegare i sommar.

Ved handelsslutt onsdag blei aksjen handla for 0,48 kroner.

Handelsdagen onsdag førte ikkje med seg dei store byksa i kurs, og Havila Kystruten er mellom dagens børsvinnarar frå Nordvestlandet, med ein auke på 3,11 prosent.

Tidleg på dag var kursen oppe i 1,25, men utover dagen fall aksjen litt tilbake, og avslutta på ein kurs på 1,16 kroner per aksje. Med det ligg prisnivået framleis godt over emisjonskursen frå tidlegare i sommar.

I samband med retta emisjonar er det vanleg praksis å gjennomføre reparasjonsemisjonar for å bøte på utvatninga av eigarforhold i selskapet for dei eksisterande aksjonærane, og Kystruten har meldt at dei planlegg å gjennomføre ein slik emisjon.

Blir aksjen handla på børs for ein lågare pris enn emisjonskurs, er det ikkje noko poeng for aksjonærar å teikne rettar til nye aksjar gjennom selskapet, når dei uansett kan auke eigardelen sin til ein lågare pris enn kva selskapet kan tilby.

I generalforsamlingsvedtaket til Havila Kystruten om reparasjonsemisjon er det derfor lagt inn ei formulering der styret har høve til å avlyse den ekstra kapitalinnhentinga dersom tilhøva taler for det.

Med onsdagens aksjekurs over emisjonskurs, aukar dermed sjansane for at reiarlaget vil gjennomføre reparasjonsemisjonen.

Hovudindeksen på Oslo børs slutta ned 1,12 prosent – etter ein positiv start på veka.

Stemninga i finansmarknadene snudde i negativ retning tysdag, noko som kan skuldast at dei langsiktige amerikanske rentene steig, skriv seniorøkonom Kristian Tafjord i Sparebanken Møre i dagens marknadsrapport.

Ei av årsakene til at dei langsiktige rentene stig, er at det tysdag kom melding om at kredittvurderingsbyrået Fitch nedgraderer USA si kredittverdighet eitt hakk. Stormakta har tidlegare vore vurdert til toppscore, AAA, men er no nedgradert til AA+.

I begrunnelsen peiker Fitch på dårlegare økonomisk styring og meir utfordrande finansielle forhold.