Børsdagen: Dagens tapar etter nytt kvartal i minus

Hofseth Biocare auka inntektene med 17 prosent i første kvartal i år samanlikna med første kvartal i fjor, og 14 prosent samanlikna med 4. kvartal i år, ifølgje kvartalsrapporten som kom torsdag morgon.

Veksten tyder på at selskapet ligg an til ny inntektsrekord i år.

Det trengst, for sjølv om underskotet i høve til inntektene held fram med å minke, er det framleis eit godt stykke att til plussresultat.

Les børsmelding her (ekstern lenke)

Hofseth Biocare foredlar avskjer og restråstoff frå laks til ingrediensar til helsekost og kjæledyrfôr. Dei utviklar óg produkt som kan bli legemiddel. Hovudkontoret ligg i Ålesund, produksjonsanlegget i Midsund.

Investorane sende aksjen ned
Investorane svara med å sende Hofseth Biocare-aksjen ned 8,97 prosent i dag, det største fallet av selskapa på Nordvestlandet (sjå tabell under) Kursen ved 15.30-tida var 2,00 kroner. Berre ein gong - i starten av april - har aksjen vore like lite verdt sidan 2018.

I november 2019 var kursen over 10,50 kroner aksjen, men har falle i rykk og napp sidan. Kursauken i 2019 skuldast forventingar til inntektene frå ein helsekostkontrakt i USA, som ikkje blei innfridd.

Før børsen opna i dag hadde aksjekursen i Hofseth Biocare falle 19,85 prosent sidan årsskiftet og 34,17 prosent i siste 12-månadersperiode.

Pluss på drifta
I kvartalsrapporten for 4. kvartal 2023 skreiv selskapet at målet for 2024 er å auke inntektene med nye 50 prosent - og levere eit driftsresultat i pluss før av- og nedskrivingar.

Selskapet foredlar avskjer og restråstoff frå lakseslakteri til ingrediensar i dyrefôr og helsekostprodukt. Hovudkontoret ligg i Ålesund, produksjonsanlegget i Midsund.

Største aksjonærar er det sveitsiske selskapet Six Sis AG (20,43 prosent), Hofseth International (18,39 prosent), RH Industri (16,86 prosent) ogh japanske Yokorei Co. Ltd (9,96). Roger Hofseth eig RH Industri og er stor aksjonær i Hofseth International.

Artikkelen er oppdatert med dagens aksjekursar for børsnoterte selskap på Nordvestlandet, etter at børsen stengte for dagen.