Drøymer om nytt turisteventyr på Vestkapp

NPK: Målet er å freiste investorar til ei storstilt reiselivssatsing, skriv Dagens Næringsliv.
Salsannonsen ligg ute på Finn.no under overskrifta «Unik tomt på Vestkapp til sals». Kjøparen av Vestkapp må forplikte seg til å vere i gang med bevertning og/eller overnatting innan to år. Seljar er Selje kommune ved eigedomsavdelinga, som ikkje har villa ta seg råd til å hyre inn ein eigedomsmeklar.
Namnet Vestkapp fann reiselivsnæringa på ein gong på 1980-talet i håp om at det skulle bli eit enklare namn å selje inn til turistane enn Kjerringa. Vestkapp, som ligg om lag 500 meter over havet, vert rekna som Noregs vestlegaste fjellplatå, men det vestlegaste fastlandspunktet ligg i Hordaland.

Fjell, hav og vêr

Ein kjem seg til Vestkapp via ein 3,2 kilometer lang vinterstengt kommunal veg frå fylkesveg 633. Det er ikkje offentleg vatn eller kloakk i området. Der er eigentleg ingenting utover fjell, hav og veldig mykje vêr i form av over 50 stormdøgn i året.
Det finst ein annan privat aktør – Vestkapphuset – der vegen sluttar. Vestkapphuset, med kafé og suvenirbutikk, har ikkje vore ope dei siste seks åra, men til sommaren er det lova ny aktivitet.
– Vestkapp kan bli det nye fyrtårnet i regionen vår. Staden trekker til seg turistar også i dag, men det trengst å bli lagt meir til rette for slike ting som mat, opplevingar og overnatting. Eg tenkjer ikkje på ein mastodont av eit hotell, men snarare bygg som glir inn i terrenget og der ein kan stå på innsida og oppleve stormane.
- Det bør gjerne vere mogleg å ete ein betre middag, gjerne i kombinasjon med nokre eksklusive overnattingstilbod, seier ordførar Stein Robert Osdal (KrF) til avisa.