Eit mangfald bedrifter som vil etablere seg

Tysdag vart det markert at mudringsprosjektet, som Giske kommune har utført ved Gjøsundet på vegner av Kystverket, er ferdig.

Mykje av massane som er greve ut frå sjøbotnen, er deponert i eit nærliggande stranddeponi og ført til utviding av eit stort område til ny industri på sydspissen av Vigra.

Her er det stor interesse for å etablere seg, fortel ordførar Kenneth Langvatn i Giske til NETT NO.

– Det er stor merksemd om heile prosjektet, og vi trur det vil vere forløysande for næringsutviklinga i heile området, fortel han.

Fiskerihamn med meir attåt
Området skal i første rekke utviklast som nasjonal fiskerihamn – men det blir meir attåt.

– Vi legg vekt på at dette skal vere fiskerinæringa med tilhøyrande verksemder, men det er også andre som ser nytta av å kome inn og bli ein del av Gjøsundet, seier Langvatn.

I denne omgang er det kome til kring 350 mål med nytt næringsareal – og ein stor del av dette, er laga med massar frå sjøbotnen.

– Her vil vi få ei industriell symbiose med synergiar på tvers av ulike fag- og industriar, og det er eit stort mangfald av bedrifter som har fanga interesse for dette, legg han til.

Håpar fryseaktør snart kjem på plass
Giske-ordføraren håpar ein fryseriaktør er mellom dei første brikkene som kjem på plass.

— Det vil vere det første naturlege steget og utløysande for den vidare utviklinga, seier han.

NETT NO har tidlegare omtala at Norwegian Hydrogen og Biogass Møre er mellom dei som har meldt si interesse for å etablere seg.

Også aktørar frå den danske hamnebyen Hirtshals har vore på besøk for å sjå korleis Gjøsundet passa inn i deira planar om å få meir transport over på skip.

Vil bli «One stop shop» for fiskeflåten
Mudringsprosjektet har gått føre seg sidan 2019 med mål om å utdjupe Gjøsundet. Mudringa blei avslutta seint i fjor, og tysdag vart det heile markert med overlevering.

Til sjølve hamneprosjektet vart det sett av 105 statlege millionar kroner. Det er også vidare planar om utbygging på begge sider av sundet mellom Valderøya og Vigra.

– Fiskebåtane som kjem inn frå tur skal få ordna mest mogleg på ein plass. Om vi lukkast med det, vil denne hamna skilje seg ut frå andre hamner i regionen. «One stop shop» er vel eit godt nynorsk ord for det, har dagleg leiar Louis Nordstrand i Gjøsund Utvikling tidlegare fortald NETT NO om korleis dei såg føre seg utviklinga.