Fekk fleire arbeidplassar etter nedlegging

- Ein trist dag, seier Katrin Skåden om då ho fekk melding om at Skogstad ikkje lenger skulle sy i Noreg. Då hadde ho jobba i bedrifta, som var Innviks nest største private arbeidsplass, i over 16 år.
På topp var dei litt over 30 tilsette i fabrikken. På 90-talet var det som var att av norske klesprodusentar på full fart ut av landet. Skogstad var ikkje noko unntak, sjølv om avgjerda satt langt inne. I 1998 var det heilt slutt på sying i Noreg.
Men i dag er dei nesten like mange som jobbar i det gamle fabrikkbygget som før, og Skogstad er atter nest største private arbeidsplass i Innvik.

Fleire enn før

Der det før var symaskiner og transportband er det i dag møterom, showroom, butikk og kontor for folk som tek seg av sal, marknadsføring, økonomistyring, datasystem og frakt.
Rundt 20 personar har arbeidsplassen i bygget. Designarar og seljarar som bur andre stadar utgjer ni personar. På toppen av dette kjem tilsette i åtte heileigde butikkar.
Skåden, som kom attende til Skogstad for to år sidan, har mellom anna ansvaret for reklamasjonar, og er i dag den einaste det tidlegare fabrikbygget som framleis handterer ei symaskin.

Reiste til Kina

Skogstad flytta heile produksjonen til Kina, og gjekk over frå å sy sjølv til å få andre til å sy for seg.
I starten sleit bedrifta med mykje feilvarer, men straks den sende sin eigen representant til Kina vart det slutt på mistydningar og dårleg kommunikasjon, som var årsaka til mange av feila.
I dag har Skogstad sitt eige Kina-kontor, med sju tilsette, som mellom anna har ansvaret for å følge opp fabrikkane.
Han som bygde opp kontoret, Henning Skogstad, kom heim etter ti års Kina-opphald, og tok over som toppsjef etter sin far - Anton Skogstad - for eitt år sidan.

Flytta heim

- Eg må seie eg stortrivdes i Kina, seier Henning Skogstad.
Men avgjerda om å flytte til Noreg valda ikkje store kvaler, heller ikkje hos kona Li Hongmei som han møtte og gifta seg med i Kina.
- Vi er tilpassningsdyktige, vi trivst der vi er, og her er det jo flott, seier Skogstad.

...men blir i Kina

Fabrikkane i Kina er det derimot ikkje planar om å flytte frå, sjølv om lønene til arbeidarane er meir enn dobla sidan Skogstad byrja å sy der. Andre asiatiske land har eit lågare lønsnivå, men ein dårlegare infrastruktur. Dei undersøkjingane Skogstad har gjort tyder på at det er samla sett er lite å spare på å sy andre stadar, samstundes som det er kostbart å byggje opp verksemd i eit nytt land.
Dessutan skremer erfaringar frå land som Bangladesh. Det er dårleg reklame med ulykker og dårlege arbeidsvilkår for dei tilsette i tekstilindustrien.
- Det enda med at vi blir i Kina. Kina har utvikla seg utruleg mykje på desse åra. Vi treng ikkje bekymre oss for kvalitet på same måte som før, seier Skogstad.

Drøymde om fabrikkar

I dag får Skogstad sydd plagga sine hos ti fabrikkar, og har ytterlegare 30 fabrikkar på lista over moglege leverandørar. Flesteparten held til i og rundt Hangzhou, ein naboby til Shanghai.
Skogstad anslår at han har besøkt mellom 200 og 300 fabrikkar for å plukke ut dei han i dag brukar. Fleire gangar han han leika med tanken på å etablere eigen produksjon i Kina. Men då ville han fått ansvaret for fleire hundre tilsette, miste fleksibilitet og moglegheit til å flytte produksjonen.
- Det var ein draum ei stund, men eg er glad eg slo det frå meg, seier Skogstad.

Tøffare marknad

I 2013 har Henning Skogstad og resten av leiinga har brukt mykje tid på å meisle ut ein plan for å løfte både sal og resultat. Mellom anna har bedrifta investert rundt to milionar kroner i eit datasystem som automatiserer bestilling, fakturering og adressering.
Skogstad har og utvida samarbeidet med fleire sportskjeder. Målet er å vere inn hos dei fleste. I dag det berre XXL Skogstad ikkje avtale med.
Men marknaden er blitt tøffare, det er det ingen tvil om, meiner Skogstad. Leverandørane blir skvisa frå to sider, høgare kostnadar i produksjonslanda og hardare prispress frå sportskjedene i Noreg.
- Det er overetablering av sportsbutikkar, og hardare konkurranse, seier Skogstad.