Fire utan jobb etter Volda-konkurs

Det drygt tre år gamle firmaet Maler Proff Volda har meldt oppbod. Det kjem fram i ei kunngjering frå Brønnøysundregistera torsdag.

Bustyrar Hege Robudal Stenkløv fortel til NETT NO at ho har fått papira frå retten, men at ho førebels ikkje har sett seg inn i saka.

NETT NO har snakka med innehavaren, som ikkje vil la seg intervjue. Han opplyser likevel at dei har vore fire tilsette i firmaet der Sunnmøre tingrett no har opna konkurs.

To år med underskot
Firmaet hadde ei omsetning på 3,4 millionar i 2019 og 2,3 millionar i oppstartsåret 2018. Begge åra enda med underskott på til saman kring 450.000 kroner. Selskapet hadde difor negativ eigenkapital ved inngangen til fjoråret.

Dette blir kommentert i den siste offentlege rekneskapen frå 2019, der styret påpeiker at dei vurderer fortløpande behovet for å skyte inn meir pengar.

På det tidspunktet var den kortsiktige gjelda på drygt 700.000 kroner – og om lag halvparten av dette var avgifter til det offentlege.

Konkurstala har stupt
Så langt i år er det langt færre konkursar enn på same tid i fjor. For Møre og Romsdal er talet på konkursopningar halvert frå 50 til 26.

For dei fire Nordfjord-kommunane er nedgangen enno større. Medan det i fjor var registrert ti konkursopningar halvvegs inn i mars månad, er det i år berre registrert ein konkurs i Gloppen. I Stryn, Stad og Kinn er det ikkje registrert konkursar i år.

Også på landsbasis har det vore færre konkursar enn i eit normalår.

Flest konkursar i bygg- og anlegg
Av dei 26 konkursane i Møre og Romsdal er minst ni knytt til bygg- og anleggsbransjen. Også den eine konkursen i Gloppen – Møre Utemiljø – kjem frå denne bransjen.

Det er ingen større bedrifter som har gått over ende på Nordvestlandet så langt i år.

Årsaka til at det er færre konkursar etter koronapandemien slo til, er at styresmaktene i langt mindre grad enn tidlegare følgjer opp krav mot bedrifter som til dømes skuldar skatt eller meirverdiavgift.