Geiranger vil utvide sesongen

Etter at turistbedriftene i Geiranger kjøpte ut Stranda og Nordal kommuner, og fekk kontrollen i destinasjonsselskapet blir det jobba på spreng for å meisle ut vegen vidare for Destinasjon Geirangerfjord Trollstigen.
Til generalforsamlinga i juni skal alt vere klart, men med opninga av turistsesongen i mai må mykje av arbeidet vere unnagjort før den tid.
- Vi har ein sesong som er ekstremt pressa, seier dagleg leiar Ove Skylstad i Destinasjon Geirangerfjord Trollstigen.

Vil forlenge

Utvida sesong er det ønsket som går att hos dei aller fleste medlemsbedriftene i destinasjonsselskapet. Det seier Harald Espeland, som er styreleiar i selskapet. Det er han som har hovudansvaret for å kartlegge korleis medlemsbedriftene meiner destinasjonsselskapet skal arbeide.
I første omgang er det snakk om å forlenge sesongen i begge endar, men etterkvart også heilårsturisme, i følgje Espeland.

Men korleis er viljen hos dei mange mindre bedriftene til å halde ope og gi turistane eit tilbod i nærleiken av det dei møtet om sommaren?
- Den er stor seier Espeland.

Må samordnast

Trass i viljen meiner Espeland det likevel det må arbeidast ein god del med å samordne og semjast om korleis bedriftene skal halde ope for å utvide sesongen.
Dagleg leiar Ove Skylstad vonar på oppsluttning også om heilårsdrift. Hotel Union har satsa på vintersesongen i fleire år, men har så lagt vore nokså åleine.
- Eg håpar fleire har lyst til å utvide sesongen og satse ut over vinteren, seier Skylstad.

Tok over laget

Etter at planen om å slå saman dei tre destinasjonsselskapa på Nordvestlandet gjekk i vasken i fjor (les meir under Relaterte saker), gjekk det mot ei nedlegging av Destinasjon Geirangerfjord Trollstigen.
Ei ekstaordinær generalforsamlingvedtok å oppløyse selskapet.
Nedlegginga vart forhindra ved at turistbedriftene i Geiranger, gjennom Geiranger Turist- og Næringslag, kjøpte aksjane som kommunene Stranda og Nordal sat med og sikra seg meir enn to tredjedels fleirtal.

Utvidar på fjorden

Fjord 1 sitt reiselivsselskap, Fjords, som driv ferja Geiranger - Hellesylt, varsla i førre veke at det vil forlengje sesongen med ein månad frå og med i haust. Det betyr ferjedrift i heile oktober.
Blir det vellukka er neste steg heilårsdrift.

Samfunnsrolle

NETT NO møtte Ove Skylstad saman med Kenneth Løken i Geiranger Turist og næringslag under Grøn fjord-konferansen i Geiranger i førre veke.
Dei peika mellom annan på rassikker veg til Eidsdal, tunnellsamband austover, ferje på fjorden, vern av landbruket og skule- og barnehagetilbod som viktige saker å arbeide med, også for destinasjonsselskapet.
Kanskje litt på sida av det eit destinasjonsselskap arbeider med?
- Det blir ofte sånn. Skal du ha fleire arbeidsplassar og legge til rette for heilårsdrift, så må du legge til rette, seier Løken.