Glad for at tidlegare verftseigar må «ta ansvar»

Fredag blei det kjent at Gulating lagmannsrett dømte Tomislav Debeljak til å betale 120 millionar kroner i erstatning etter Kleven Verft-konkursane. 

Den tidlegare eigaren av verftsselskapa var saksøkt for 135 millionar kroner av konkursbuet. Også forsikringsselskapet Tryg er dømt til erstatning på 30 millionar i saka. 

Alt om søksmålet etter Kleven-konkursane

Tidlegare verftsdirektør Kjetil Bollestad er glad for den samrøystes dommen frå lagmannsretten. 

– Vi har fått tydeleg fakta til lagmannsretten i denne surrealistiske og vanskelege perioden på Kleven verftet, opplyser han Nett No. 

Han påpeiker at saka har vore ei stor belasting for mange tilsette ved verftet. 

– Glad for at rettssystemet i Noreg fungerer godt, og at Tomislav og Div Group må ta ansvar for handlingane sine, legg Bollestad til. 

I si forklaring i rettssaka sa den tidlegare verftsdirektøren at den kroatisk eigaren dreiv useriøst og ikkje respekterte norske arbeidsvilkår. Delbejak fortalde på si side at han var provosert av å bli framstilt som «gangster» og «tjuv».

Glad, men ikkje overraska
Bustyrar Bjørn Åge Hamre fortel til Nett No at han er glad – men ikkje overraska over dommen frå lagmannsretten. 

– Det har vore ein krevjande prosess med mykje motgang, men vi har aldri vore i tvil om at det var rett å ta ut søksmålet. At det var rett, fekk vi stadfesta av ein einstemmig lagmannsrett, opplyser han. 

Om dommen blir ståande, er det mogleg at fleire lokale selskap som tapte pengar i konkursane får noko tilbake. 

– Det er gode utsikter til at det blir utdeling til ordinære kreditorar, opplyser Hamre. 

Vegsund Slip og Nordnes-reiarlaget på Giske har tapt betydelege beløp, medan Tussa IKT, Wenaas Workwear og Metizoft har meldt inn mindre krav til buet. 

Ingen kommentar til dommen
Nett No var fredag kveld i kontakt med Debeljak og spurte om ein kommentar til dommen. Han svara at han ikkje visste om avgjerda og let vere å svare på oppfølgingsspørsmål. 

Debeljak sin advokat, Karl Rosén, opplyser til Nett No at dei verken har noko kommentar til dommen, eller svar på spørsmålet om dei vil anke. 

Moglegheita til å anke saka til høgsterett er avgrensa, og mellom anna kan ikkje bevisvurderinga overprøvast. 

Usamde med tingretten på fleire punkt 
Lagmannsretten er usamde med dommen frå tingretten på ein rekke punkt. Medan tingretten i stor grad la skulda for verftskonkursane på bankane, peiker lagmannsretten tydeleg på Debeljak.

Oppsummert meiner lagmannsretten at den nye eigaren oppførte seg aktlaust i strid med i aksjelova om styreansvar og at han tok kontroll over selskapsdrifta på ein måte som braut med god selskapsstyring. 

Debeljak og Div Group-konsernet kom inn som eigarar av det dåverande Kleven-verftet vinteren og våren 2020. 

Tre månader etter dei kroatiske eigarane kom inn, var tre verftsselskap konkurs og fleire hundre verftsarbeidarar utan jobb. I ettertid gjekk konkursbuet til søksmål mot Debeljak personleg for tapa som oppstod.

Braut ikkje god forretningsskikk
Eit mykje omtala skjebnemøte den 23. juni 2020, er sentralt i lagmannsretten si vurdering. 

Verftsleiaren  sine uttaler i møtet, mellom anna om at han ikkje ville dekke eit tap på eit viktig byggeprosjekt, var ai aktlaus og ansvarstingande åtferd, meiner lagmannsretten. 

Medan dei saksøkte meiner bankane braut god forretningsskikk ved å seie opp låna, meiner lagmannsretten det var nødvendig og riktig for å ta vare på bankane sine interesser, heiter det i dommen.

Alt om søksmålet etter Kleven-konkursane

• NETT NO gjer merksam på at Green Yard Kleven ikkje har noko med søksmålet å gjere, som omhandlar det tidlegare verftsselskapet på Kleven.