Har fått fart på salet av selprodukt

- Ja, vi har kjempa i motbakke i lang tid. Endeleg ser det ut til å losne.
Det seier dagleg leiar Arnfinn Karlsen i Polargodt.
Selskapet leverte i fjor eit resultat før skatt på 1,4 millionar kroner, medan det året før var minus 0,6 millionar.
Ei overføring frå Nærings- og Fiskeridepartementet på 1,8 millionar kroner bidrog sterkt til plusstala.
- Dette er ikkje eit tilskot, men betaling for prosjekt og arbeid utført dei fem siste åra, seier Karlsen.

Mange produkt

Han ivrar for ei næring som kan klare seg utan overføringar, og er på god veg mot målet.
I fjor selde selskapet selskinn, selolje og andre produkt for 1,5 millionar kroner. 0,4 millionar kroner kom frå ulike sjølvutvikla produkt av selskinn, som puter og nakkestøtter.
Også sjølve skinna gjekk unna, men størst omsetning er det for Polarolje og annan selolje.

Til Asia

Karlsen seier at det er spesielt stor etterspurnad frå Taiwan og Kina, i tillegg til at Kanada viser aukande interesse.
- Det er spesielt selolje som kosttilskot som interesser. Stadig fleire har fått opp augene for dei postive helsemessige effektene av seloljen.
I år har selskapet tatt imot 1500 grønlandssel.
- Vi kunne tatt imot mykje meir, seier Karlsen.

Selolje som måling

Siste åra er det berre Alta-skuta Havsel som har jakta sel. No håpar Karlsen på at fleire vil melde seg på.
- Vi kan i alle fall ta imot all fangsten frå tre skuter.
Han har no starta utvikling av endå eit produkt, nemleg måling basert på selolje og tran.
- Utruleg spennande. Fram til 1950 var det denne type måling som vart brukte på bygningane her rundtom.
- Vi ser no etter ein større aktør å samarbeide med rundt denne satsinga.

Byggjer ut

Polargodt hadde i fjor to fast tilsette, i tillegg til at ein var rundt 15 i sesongen.
- Vi ser etter fleire tilsette. Lenge var det uråd å få tak i nokon, men no er mailen full av søkjarar. Det er tydeleg at offshorenedturen merkast.
Selskapet byggjer no ut mottaksanlegget.
- Vi kan no ta imot 1200 dyr per dag, og oljeraffineriet fungerer perfekt.
- Endeleg kan vi sjå framover, og ser at det faktisk er muleg å leve av drive eit mottaksanlegg for sel.