Hastverk for hydrogenfartøy

I fjor sende reiarlaget Maris Fiducia Norway, Hav Group sitt datterselskap, Hav Hydrogen, og Norwegian Hydrogen ut ei felles pressemelding om eit samarbeid for å utvikle eit frakteskip som skal gå på hydrogen.

I juni 2024 fekk Maris Fiducia Norway tilsagn om 299.976.465 kroner i støtte frå statlege Enova til fem fartøy. Tilsagnet blei gitt som ein del av programma «Hydrogen i fartøy» og «Ammoniakk i fartøy» som blei lansert i desember 2023, og hadde søknadsfrist 22. mars 2024. Formålet med programma er å etablere dei første fungerande verdikjedene for ammoniakk og hydrogen til maritime formål, ifølgje ei pressemelding frå Enova.

Hav Hydrogen sitt bidrag var selskapet si løysing for eit komplett hydrogenbasert energisystem for skip, kalla Zepods.

Om hydrogen er produsert ved hjelp av kraft frå fornybare energikjelder vi det vere ein energiberar som ikkje gir utslepp av CO2.

Satsing på is
No legg Hav Group hydrogensatsinga si på is fordi marknaden for hydrogen i skipsfarten utviklar seg saktare enn Hav Group hadde venta, fortel selskapet i kvartalsrapporten for 1. kvartal 2025.

Den avgjerda heng delvis saman med og får betydning for Maris Fiducia-prosjektet ifølgje kvartalsrapporten.

"Dette har ført til økt usikkerhet knyttet til realisering av tidligere forventede prosjekter og tidspunktet for dette, herunder de potensielle ZEPOD-kontraktene til Maris Fiducia-prosjektet som har vært kommunisert tidligere. I lys av dette og den generelle negative markedsutviklingen er det besluttet å redusere både kostnadsnivå og aktivitetsnivå i HAV Hydrogen, samt sette byggingen av ZEPOD-prototypen på hold inntil en strategi for selskapets videre drift er nærmere etablert.", heiter det i kvartalsrapporten.

Avgjerd innan ein månad
Det er det norske selskapet Maris Fiducia Norway som står i spissen for hydrogenskip-prosjektet.

Maris Fiducia Norway er eit datterselskap av nederlandske Maris Fiducia, som driv ein flåte på over 20 tørrlastskip og tankskip. Selskapet sitt norske datterselskap skal stå for drifta av dei hydrogendrivne skipa, som skal leigast ut til reiarlaget sin samarbeidspartnar Schulte & Bruns.

Dagleg leiar Richard Goudie Inkster i Marius Fiducia Norway seier reiarlaget må ta ei avgjerd om investeringsbeslutning innan ein månad for å innfri fristen for støttetilsagnet frå Enova. Om det blir vedtatt å bygge skipa og utstyret frå Hav Group ikkje er tilgjengleg vil selskapet søke å gå vidare med andre alternativ.

Det er avklaring om finansiering hos sluttbrukaren som har tatt lengre tid enn opphavleg planlagt.

Skal levere hydrogen
Norwegian Hydrogen si rolle i Maris Fiducia-prosjektet skal vere å produsere og levere hydrogen til båtane.

Norwegian Hydrogen arbeider vidare med Maris Fiducia-prosjektet.

Norwegian Hydrogen-sjef Jens Berge skriv i ein epost til NettNo at "Vi arbeider tett med Maris Fiducia og eierne bak. Dette er erfarne folk som kan shipping. Deres overbevisning om at hydrogen er riktig nulllutslippsløsning for dem forblir uendret. Vi er kjent med at de vil komme med en utmelding i midten av juni."

Han beklagar og at Hav Group har nedskalert hydrogensatsinga si:

"Det synes vi er synd, men det er vurderinger de selv må ta stilling til. Vi arbeider videre med vårt, og håper de kommer sterkt tilbake etter hvert. Vi har alltid hatt stor glede av å arbeide sammen med Hav Group og HAV Hydrogen. Det er et godt system med mange flinke folk.", skriv han i eposten.