Havila-gjeld blir gjort om til aksjar

Refinansieringsavtalen av offshorereiarlaget, som blei inngått i 2020, gav långivarane mellom anna rett til å gjere om gjeld til aksjar ved utløpet av 2024.

Långivarane hadde frist til i går med å bestemme kva dei ville gjere.

I dag tidleg har Havila Shipping sendt ut ei børsmelding om utfallet. Når første omgang av konverteringa av gjeld til aksjar er gjennomført vil dagens aksjonærar - utanom Havila Holding - eige 4,2 prosent av offshorereiarlaget.

Les børsmelding her

Artikkelen blir oppdatert

Delte gjelda i to
- Vi har forhandla med bankane i tretten månader, og det er godt å endeleg kome i mål med ein avtale som sikrar at vi kan drive tilnærma normalt dei neste fem år, sa Havila Shipping-sjef Njål Sævik då refinansieringsavtalen var klar i 2020.

Refinansieringsavtalen delte gjelda ein renteberande og ein ikkje renteberande del

Renteberande gjeld er berekna til 651 millionar kroner ved utløpet av 2024, ifølgje børsmeldinga.

Eigarane av 500 millionar av den renteberande gjelda vil ha tilbakebetaling innan årsskiftet.

Dei same långivarane eig og ei ikkje renteberande gjeld på 522 millionar kroner , som skal gjerast om til aksjer innan 2024 er omme. Det vil gi ein eigarandel på 21,5 prosent.

Ventar eitt år
Eigarane av 151 millionar kroner i renteberande gjeld forlengar låneavtalen ut 2025. Dei eig og ei ikkje renteberande gjeld på 617 millionar kroner.

Desse långivarane får gjort om gjeld til aksjar som er berekna å utgjere ein eigarandel på 25,5 prosent. Sidan låneavtalen er forlenga vil konverteringa først skje ved utløpet av 2025 og den endelege eigarandelen kan bli redusert at gjelda blir nedregulert undervegs.

Storaksjonær Havila Holding er og part i refinansieringa. Selskapet vil konvertere deler av eit likviditetslån på 100 millionar kroner og opprettheld dermed sin eigarandel på 50,96 prosent.

Havila Shipping har lova ein såkalla reparasjonsemisjon, der dagens aksjonærar kan bli med. Storleiken på den er ikkje avklart. I og med at nokre långivarar forlenga låneavtalen er reparasjonsemisjonen også utsett eitt år.

Havila Holding er medeigar i Bakkar og Berg Media as, som gir ut Nett No.