Hexagon Purus henta 600 millionar

Hexagon Purus opplyste seint tysdag kveld i ei børsmelding at dei hadde lukkast med å hente inn 600 millionar.

Emisjonen blei meld på ettermiddagen.

Pengane frå kapitalutvidinga skal gå til marknadsarbeid, ny batterifabrikk i Canada, utvida produksjonskapasitet i Kina og fleire tilsette.

Flakk-familien held på eigardel
Hexagon Composites, med Flakk-familien i Ålesund som nest største eigar, går inn med 440 millionar kroner i kapitalutvidinga og vil oppretthalde sin eigarandel på 73 prosent i hydrogenselskapet.

Hexagon Purus auka inntektene frå 53 til 508 millionar kroner frå 2020 til 2021, men enda likevel med 304 millionar kroner i underskot, ifølgje kvartalsrapporten som blei lagt fram tysdag morgon.

Aksjen fall 6,35 prosent i løpet av tysdagen og slutta på 24,85 kroner per aksje. Det prisa selskapet til 5,8 milliardar kroner.

Ved børsnoteringa i desember 2020 var kursen 40 kroner per aksje.

Milliardkontrakter på batteripakkar
exagon Purus er profilert som eit hydrogenselskap som lagar tankar og system for denne energiberaren. Men i år er det batterisatsinga til selskapet som betyr noko.

Fredag i førre veke varsla selskapet at dei har inngått ein intensjonsavtale med lastebilprodusenten Hino Motors Manufacturing U.S. Inc. om å levere batteripakkar for rundt ni milliardar kroner frå 2024.

31. januar melde selskapet at dei var i sluttforhandlingar om ein liknande avtale med ein ikkje namngitt kunde, ein avtale som kan bli på 10 milliardar.

Desse børsmeldingane fekk Finansavisen til å spekulere i at selskapet snart ville gjennomføre ei kapitalutviding, og tysdag viste det seg at spekulasjonen slo til.