Hyperthermics doblar underskotet

Bak Hyperthermics står mellom andre fleire investorar med adresse på Nordvestlandet. Både Roger Halsebakk og familien, Peder Stette og Frode Håkon Kjølås har blitt medeigarar gjennom kapitalutvidingar i selskapet.

Så langt har det kommersielle gjennombrotet lete vente på seg. Det samla underskotet dei siste sju åra er på 87 millionar kroner, etter 33 millionar kroner i minus i fjor.

Lagar biogass av biologisk avfall
Ideen til Hyperthermics er å bruke ein bakterie som trives under trykk og med høge temperaturar i anlegg som vinn ut biogass frå nedbryting av biologisk avfall.

Gassen kan brukast som energikjelde på lik line med naturgass frå tradisjonell olje- og gassutvinning. Gassen blir rekna som nøytral med omsyn til CO2-utslepp fordi den er basert på biologisk materiale, der gassen inngår i ein krinslaup og ikkje tilfører atmosfæren meir CO2.

Fleire kapitalutvidingar
Hyperthermics spring ut av miljøet rundt Natural-gründer Jan Remmereit i Hovdebygda. Selskapet var eitt av selskapa som blei etablert etter at han selde aksjane sine i Natural til Kjell Inge Røkke sitt Aker, i 2006.

Selskapet har gjennomført fleire kapitalutvidingar og i 2018 vart innsatsen auka, med fleire tilsette og hovudkontoret plassert i Ulsteinvik.

Ved utløpet av 2023 var energiselskapet Vardar, Halsebakk-familiens investeringsselskap Ronja Capital II og Life Capitol dei tre største aksjonærane, med tilsaman omlag 45 prosent av aksjane. Jan Remmereit og hans familie er største eigar i Life Capitol.

Mest tilskot
Inntektene krympa og underskotet steig for Hyperthemics i Ulsteinvik i fjor (sjå tabell). Til skilnad frå 2022 utgjorde dessutan tilskot storparten (72 prosent) av inntektene i 2023. I 2022 utgjorde tilskot 28 prosent av dei samla inntektene til selskapet.

Samstundes auka kostnadane, frå 15 til 29 millionar kroner. Det er meir enn dobla lønskostnadar, til 10,4 millionar kroner og auka avskrivingar som utgjer storparten av kostnadsauken. Avskrivingane på driftsmidlar og immatrielle eignelutar auka frå 6,4 til 11,3 millionar kroner.