Hyperthermics verdsett til 200 millionar

"Rundt 200" (millionar kroner, red. merk) seier investeringsdirektør Tore Tønseth i Ronja Capital II om verdsettinga av Hyperthermics.

Ronja Capital II er investeringselskapet til Sølvtrans-sjef Roger Halsebakk og familie som saman med Stette Invest og Kjølås Stansekniver har kjøpt 23,3 prosent av aksjane i Hypthermics.

Stette Invest er eig av Peder Stette og familie, Kjølås Stansekniver av Frode Håkon Kjølås. Stette og Kjølås var medeigarar i sjømatindustriutstyr-selskapet Optimar, som no er eigd av tyske Haniel Group.

Kjøpte ut aksjonærar
Med ei verdsetting på 200 millionar kroner betry det at trioen Halsebakk, Stette og Kjølås betalte omlag 47 millionar kroner for Hyperthermics-aksjane.

Seljar var Hyperthermics sjølv, som i fjor kjøpte ut tre aksjonærar og i år kjøpt ein del av aksjane til ein fjerde aksjonær.

Ifølgje selskapet var dei som selde i fjor Invest 24 (8,2 prosent) med blant andre Arild Bødal og Malvin Sandbakk i Stryn på eigarsida, Agder Næringsselskap (5,5 prosent) og Grønn Vekst (5,8 prosent). (Tala i prosent er eigarandelen dei hadde).

Tidlegare i år har Hyperthermics Holding redusert sin aksjepost til 22,6 prosent gjennom eit sal til selskapet, som i sin tur selde vidare til Halsebakk/Stette/Kjølås.

Jan Remmereit med familie eig over 80 prosent av aksjane i Hyperthermics Holding. Remmereit har grunnla helsekostselskapet Natural som seinare vart seld til Kjell Inge Røkke-dominerte Aker. Frå miljøet rundt Remmereit har også legemiddelselskapet Arctic Bioscience sprunge ut.

Finansiere satsing
Ideen bak Hyperthermics er å bruke bakteriar som lever og trivest i høg temperatur og trykk til på bryte ned biologisk materiale.

Kort forklart får slike bakteriar fart på nedbrytinga, som betyr at biogassanlegg får auka kapasiteten. Selskapet har og utvikla bruken av slike bakteriar til å utvinne protein frå fiskeavfall.

Hyperthermics har hatt eit pilotanlegg i drift ved avfallhandteringsselskapet Lindum sitt biogassanlegg i Drammen sidan 2016.

Det kommersielle gjennombrotet har tatt lenger tid enn selskapet har venta, men i løpet av fjoråret og i år har selskapet varsla fleire intensjonavtalar og tidlegare denne veke også ein avtale om å bygge eit testanlegg i Danmark til omlag 20 millionar kroner.

Hyperthermics skal vere partnar i finansieringa av anlegget, og pengane frå aksjesalet til Halsebakk/Kjølås/Stette er ein del av finansieringa av anlegget i Danmark.

Modellen med å vere med og finansiere anlegg kan blir brukt også seinare, og selskapet vil i løpet av året vurdere ein emisjon i Hyperthermics, i følgje dagleg leiar Erlend Haugsbø.