Inviterer fiskarane inn i klyngesamarbeid

Økland er leiar for klyngeorganisasjonen Martime Cleantech, som mellom anna arbeider med å utvikle batteriteknologi og bruk av ammoniakk og hydrogen som drivstoff i skip.
Så langt manglar klyngeorganisasjonen fiskerbåtreiarar som medlemer. Det håpar Økland klynga snart får, etter at Regjeringa har varsla ein avgiftsauke på CO2-utslepp som omlag vil doble kostnaden med å bruke diesel som drivstoff i fiskeflåten.
- Det er ein liten wake-up call for denne flåten, seier Økland om kva ho trur blir effekten av avgiftsauken regjeringa vil innføre.

Fordel å stå saman

I eit innlegg i NETT NO inviterer Økland fiskarane til å bli med i klynga. Det er ein fordel å samarbeide, skriv ho:
"Å utvikle nye løysingar for framtidas fiskeflåte er sjølvsagt lettare sagt enn gjort. Det krev ein stor koordinert innsats. Difor må alle gode kreftar jobbe saman for å legge til rette for låg- og nullutsleppsløysingar i fiskerinæringa. Difor inviterer eg interesserte på ein digital kaffikopp for å diskutere korleis me saman kan gjere framtidas fiskeflåte grøn!"

Starta i 2011

Maritime Cleantech har hovudkontor på Stord og blei etablert i 2011, delvis basert på arbeid som alt var i gang hos offshorereiarlag som vurderte bruk av naturgass og hydrogen som alternative energikjelder. Klynga har 134 medlemer.
I dag har Maritime Cleantech mellom anna fire EU-prosjekt i gang for å teste ut bruk av anna drivstoff enn diesel; utvikling av eit hydrogendrive kystfrakteskip, eit ammoniakkdrive offshorefarty, ein batteridriven hurtigbåt og ei hydrogendriven ferje.

I tillegg til teknologiutvikling arbeider klynga inn mot styresmakten for å få endre reguleringar som står i vegen for teknologiutviklinga.

Støtte å hente

Slik Økland ser det, er det brei politisk oppslutnad om å redusere CO2-utslepp. Klima- og miljøminister Sveinung Rotevatn sa tirsdag at det ikkje er aktuelt å frita næringar frå den auka CO2-avgifta. Det gjer også at det er gode sjansar for offentleg støtte til tiltak som kan redusere CO2-utsleppa.

- Det er eit veldig godt handlingsrom for fiskarar for å få testa ut teknologi, med god offentleg risikoavlastning, seier ho.