Jaktar mange nye tilsette

- Det er mange som har lyst å arbeide om bord i skipa til Havila Kystruten. Det er nytt, det er spennande og det er interessant å vere med på denne satsinga.

Nipen har leiarerfaring både frå NAV, Kleven og Myklebust Verft, og var av dei første tilsette i Havila Kystruten.

500 seglande
Ho har administrert ein stor verksemdsoverdraging av tilsette frå Hurtigruten til Havila Kystruten.

- Rundt 360 personar skulle over, men ein del slutta og fann seg nye jobbar, spesielt ettersom skipa vart forseinka og det vart permitteringar.

- I dag er vi rundt 290 seglande tilsette og rundt 25 i landadministrasjonen. I tillegg nyttar Havila Kystruten tenester frå Havila Service, mellom anna innanfor crew, IT, innkjøp og rekneskap.

På kvart skip trengst det 60-65 på to skift, slik at totalt skal Havila Kystruten ha rundt 500 seglande tilsette når alle dei fire skipa er i drift, truleg til sommaren neste år.

- Ja, vi treng mange nye tilsette, rundt 200 på eit halvt år

God kokkerespons
Men alt no jaktar Nipen nye tilsette, sjølv om mykje er i ferd med å falle på plass når det gjeld mannskapet på Havila Castor, som skal på jomfrutur 7. april.

- Vi treng matrosar, motormenn og reparatør.

Selskapet har nyleg søkt etter kokkar, og fekk god respons.

- Vi har tilsett om lag 15 kokkar og vil halde fram med å tilsette fleire blant dei vel 60 søkarane til stillingane. Det synst vi er bra når vi veit at mange andre har vanskar med å rekruttere kokkar.

Kapteinar til alle fire skipa er også på plass.

- Ja, vi har endåtil ein i pluss, og det er godt å ha.

Får energi
Også i landadministrasjonen trengst det folk.

- Akkurat no treng vi kommunikasjonsansvarleg, digital marknadsførar, digital innhaldsprodusent og kundekonsulent.

Nipen seier at det har vore ein svært hektisk periode, men ho seier at ho samstundes stortrivst.

- Dette er ikkje ein jobb som tappar energi. Her får eg energi.

- Her er så mange flotte, engasjerte og dyktige tilsette, og det var godt å endeleg sjå andleta bak dei ulike namna eg har arbeida med over lengre tid.

- God blanding
Ho kjem frå Bigset på Hareid og er ein av sunnmøringane i selskapet, sjølv om slektsnamnet kjem frå Telavåg.

- Her er mellom anna svenskar, danskar, finnar, tyskarar og nordmenn frå Jæren til Hammerfest. Her er ei skikkeleg god blanding.