Hamnesjefen full av lovord

Sjølv om han vente ekstra lenge ettersom landgangen ikkje fungerte og passasjerane til slutt måtte gå på land over lasteluka, var hamnedirektør Knut Kusslid full av lovord om Havila Kystruten sitt nye skip Havila Capella.

- Eitt av dei flottaste skipa eg har sett. Utruleg flotte linjer.

Ved innseglinga til Trondheim vart Havila Capella helsa velkomen med vass-salutt av brannbåten «Anne Kathrine» frå Trøndelag Brann og Redningstjeneste.

- Skulle berre mangle. Dette er ei storhending, seier Kusslid.

- Bra for kysten
Han overrekte gåver til Havila Kystruten-direktør Bent Martini, og meiner det er bra for trafikken langs kysten at Hurtigruten har fått ein konkurrent.

- Dette er bra for alle. Spesielt gledeleg er det at Havila Kystruten viser veg og satar på miljøvenlege skip.

- Både designet og teknologien er spennande.

Nytt landstraumanlegg
Ved Trondheim hamn er ein no i sluttspurten på landstraumanlegget, som vil ha ein kapasitet på 2,1 megawatt.

- Anlegget er spesialtilpassa Havila Kystruten sine fire skip, seier Kusslid.

Treng nettutbygging
Han seier at det vert jobba med å få endå meir straum fram til hamna.

- Kapasiteten på nettet i dag er for dårleg. Dette har høg prioritet å få løyst, spesielt sidan vi forventar at behovet for landstraum berre vil auke.

På grunn av koronarestriksjonar fekk ikkje Kusslid gå om bord i Havila Capella.

- Eg skal om bord så fort det let seg gjere. Det gler eg meg til