Kjempeoppdrag gir full aktivitet i Hjørungavåg

For ikkje lenge sidan stod dei store industrihallane i Hjørungavåg stod tomme. No er det full aktivitet igjen etter at Bauta Group flytta inn i det Havila-eigde anlegget.

For tida har dei 60-70 personar i arbeid på ulike prosjekt.

– Vi bruker alt det tilgjengelege produksjonsarealet i Hjørungavåg på kring 6500 kvadratmeter, fortel John Arve Sundet, som er gründer og hovudeigar i Bauta Group.

Mellom oppdraga som skapar stor aktivitet, er ein rammeavtale som Bauta Construction har med Aker Solutions. På tidspunktet kontrakten blei signert, var oppdraget det største selskapet nokon gong hadde inngått.

Største arbeidsgivaren i Vestnes
Oppdraget har bidrege til at Bauta Group i dag teller kring 500 tilsette. Det gjer dei til den største private arbeidsgivaren i Vestnes kommune.

Storleiken har vore med å opne dører nettopp til slike oppdrag dei no har gåande på anlegget i Hareid.

– Kunden seier at det ikkje var nokon andre i Norge som kunne ta på seg eit slikt oppdrag, fordi det var så stort, seier John Arve Sundet.

Volum er ein nøkkel, stadfestar han.

– Du må ha ein viss storleik og kunnskap, og dokumentere at du kan gjere jobben når det gjeld sveiseprosedyrar og alt som høyrer med.

Store strukturar i stål
Då Nett No er på besøk, er dei første stålkonstruksjonane i ferd med å bli lasta om bord på ein lekter for å fraktast til Aker Verdal.

– Avtalen med Aker Solutions er å bygge ulike stålstrukturar som er ein del av «jacket-en» dei bygger ved verftet sitt, fortel Jonas Havnes Klemetzen til Nett No.

Han er dagleg leiar i Bauta Construction. Ein «jacket» er den mest vanlege plattformtypen til olje- og gassutvinning.

– Vi bygger både primærstrukturen, utrustningsstålet og det midlertidige stålet til prosjekta deira. Og dette er leveranser som for få år siden berre blei tilbudd frå utlandet, seier Klemetzen.

Håpar å halde oppe aktiviteten
Berre den pågåande kontrakten inneberer kring 2.200 tonn med stålinstallasjonar. I tillegg omfattar avtalen at Bauta-selskapet er sikra ein vidare produksjon på minst eit tilsvarande volum.

Oppdraget som allereie har gått før seg ei stund, vil gi arbeid til dei tilsette på Hareid-anlegget til over sommaren. Klemetzen kryssar fingrane for at det óg vil opne dørene til fleire kontraktar.

– Vi håpar å skaffe fleire kontraktar, slik at vi kan halde fram med ein liknande aktivitet i alle fall ut året, seier han.

Bygger seksjon til Island Offshore-skip
På berre kring ti år har John Arve Sundet vore med å bygge opp Vestnes-konsernet til dagens storleik. I dag er han styreleiar i dei ulike selskapa.

Først heite konsernet MCP, før dei la om profilen til Bauta Group i 2022. Same år omsette dei for meir enn 320 millionar - opp meir enn 100 millionar frå året før.

Veksten har kome raskare enn Sundet hadde sett føre seg. Samtidig ser han ingen grunn til at den skal stoppe no.

I den eine hallen i Hjørungavåg er dei komne langt på ei ny seksjon til offshoreskipet Island Condor, som skal forlengast ved Myklebust Verft.

– Eg trur det vil kome fleire ombyggingar, ikkje minst fordi det er ein offshoreflåte som er tilgjengeleg. Det gjer at ein kan kome raskt i gong med produksjonen, seier han.

Meir avventande til havvind
Sundet fortel at Bauta-konsernet også vil vere med på oppdrag innan havvindindustrien. Men han trur det må kome sterkare insentiv frå styresmaktene før det losnar i denne marknaden.

Industribyggjaren er ikkje i tvil om at det vil vere fornuftig at mest mogleg av desse oppdraga går til industrien her heime.

– Om det er installasjonar som skal ut langs kysten vår, så er det klart at klimaavtrykket vil vere langt mindre om produserer her i Norge, i staden for å måtte slepe det frå Asia, seier Sundet.