Tomrefjord-konsern med supervekst i fjor

Bauta Group sitt konsernrekneskap viser ei auka i omsetninga på meir enn 100 millionar i fjor. Pilane for lønnsemda peika også oppover – og resultatet før skatt enda på knappe 36 millionar kroner.

Begge delar er solide rekordar for konsernet som består av 11 ulike selskap.

Ei omsetning på 328 millionar i 2022, utgjer ei inntektsauke på meir enn 50 prosent samanlikna med 2021 (sjå tabell under).

Det vert teke utbytte på knappe 5,2 millionar etter det gode fjorårsresultatet.

Eigenkapitalen i konsernet var på 91 millionar ved utløpet av 2022, og langsiktig gjeld var då på drygt 52 millionar kroner.

Skipsindustrien viktig oppdragsgivar
Hovudbasen til Bauta Group er i Tomrefjord og verksemda gjekk tidlegare under namnet MCP Holding. Dei siste åra har konsernet vekse både gjennom oppkjøp og ved auka volum i aktivitetane til dei ulike selskapa.

Mykje av verksemda er retta mot skipsindustrien. Konsernet har over tid jobba med å utvide kundeporteføljen for å fordele risiko.

No utfører Vestnes-konsernet oppdrag for fleire enn 20 verft og jobbar med å utvide porteføljen vidare, heiter det i årsmeldinga.

Stor auke i bemanninga
Bauta Maritime er det suverent største selskapet i konsernet, men også Bauta Construction og Bauta Electro tilfører betydelege inntekter.

Auken i aktivitet har også ført til stor auke i talet på tilsette. NETT NO omtala korleis Bauta Electro tilsette 50 nye elektrikarar tidlegare i år.

Med 422 årsverk i arbeid i fjor, auka konsernet sysselsettinga med meir enn 60 prosent frå 258 årsverk i 2021.

Kronekursen kan svekke rekrutteringa
Om kronekursen held fram å svekkast, kan det bli vanskeleg å behalde dei tilsette – som i hovudsak kjem frå Aust-Europa, skriv leiinga i årsmeldinga.

I motsett tilfelle blir norske aktørar meir konkurransedyktige samanlikna med utanlandske arbeidsgivarar, påpeiker styret.

Konsernleiinga ser lyst på framtida, trass konkurransen frå industrien i utlandet.