Kjersti Kleven: - Veldig glade

- Vi er veldig glade for at vi no er i mål, seier Kjersti Kleven.
Ei gruppe investorar, med Hurtigruten i spissen, skyt inn 300 millionar kroner i Kleven og sikrar vidare drift.

I dag skal Kjersti Kleven bruke mykje tid på å informere tilsette, med allmøte både på verftet i Ulsteinvik og på Myklebust Verft i Sande.
Klevenefamilien skal framleis vere med, sjølv om familien ikkje blir sittande med aksjemajoriteten.
- Vi kjem til å vere med vidare, og fortsette å vere aktive eigarar, seier Kleven.

Arbeidd i eitt år

Store underskot dei siste åra har tæra på eigenkapitalen til Klevenkonsernet, og i årsmeldinga for 2016 skreiv selskapet at det hadde leigd inn rådgivarar for å skaffe ny kapital.
Men arbeidet med å styrke selskapet var i gang alt i fjor.
- Vi har jobba med kapitalsituasjonen i selskapet i eitt år, seier Kleven.

Ny eigarsituasjon

Hurtigruten kjem inn som medeigar i Klevenkonsernet gjennom eit nyoppretta investeringselskap, der Hurtigruten, Petter Stordalens investeringsselskap og det britiske investeringsselskapet TDR skal eige i overkant av 40 prosent. Dei andre investorane er Åge Remøy og Magnus Roth gjennom InYard Invest, det familieeigde tyske selskapet Lürssen-Group og investoren Per Lillebø.
Kjersti Kleven seier også dei eksisterande aksjonærane - først og fremst Klevenfamilien - vil legge sitt eigarskap inn i det nyoppretta investeringsselskapet.
Kleven går ikkje ut med nøyaktig fordeling av det nye eigarskapet, men det er uansett klart at det blir Hurtigruten/Stordalen og TDR som blir den største grupperinga.

Godt signal

Kjersti Kleven rosar tilsette og tillitsvalde for handteringa av situasjonen.
I juli vart det kjent at dei tilsette yter eit ansvarleg lån på 24 millionar kroner, finansiert gjennom månadlege trekk i løna.

- Eit viktig signal, også inn mot nye investorar, seier Kleven.