KLM-sjef ber om drahjelp for Ålesund-ruta

Snart går KLM over frå sommarfrekvens med to daglege flygingar mellom Amsterdam og Ålesund til vinterfrekvens med berre eitt fly om dagen.
Det er for lite.
- Om vinteren er det ikkje profitabelt, seier Nordensjef for KLM og Air France, Paul Terstegge.

Inviterer til samarbeid

Idag var han på Moa-konferansen og inviterte til samarbeid med næringslivet for å oppretthalde Amsterdam-ruta og få opp trafikken.
- Det er ein open invitasjon til regionen, seier Terstegge.

Tre gangar dagleg

KLM reduserte sist vinter tilbodet frå Vigra til ein avgang om dagen. Det kom som ein reaksjon på at trafikken gjekk ned etter oljeprisfallet.
Men dagens tal på avgangar er alt for lite etter Terstegge si vurdering, målet er å kunne ha tre daglege avgangar - morgon, midt på dagen og om kvelden - kvar dag, året rundt.
Terstegge seier større frekvens vil gi ein positiv effekt på trafikken, og veksten er eksponentiell, som betyr at veksttakta aukar med talet på avgangar.
Dilemmaet for Terstegge og KLM er eit klassisk høna og egget-dilemma. Skal frekvensen opp først, eller må trafikken auke før det blir fleire avgangar.

Satsar på forretningreisande

Det er vinteren som er problemet, det er der KLM først og fremst har behov for å få trafikken opp.
Terstegge seier KLM vil satse mest på å auke forretningstrafikken, og håpar det vil skje mellom anna ved at oljerelaett aktivitet tek seg opp - i tillegg til at KLM lukkast med å auke trafikken ytterlegare med nye tiltak.