Koronaoppsving for 80-tals-ikon

I koronaåret 2020 auka salet av Sacco-sekken frå 6,5 til 8,6 millionar kroner. Det er ny Sacco-sekk-rekord for Innvik Holding-selskapet Sacco of Norway, som kjøpte retten til møbelet frå Ekornes i 2008.

Ekornes ville frigjere produksjonskapasitet ved madrassfabrikken sin på Fetsund, og fann ein kjøpar i Innvik i Stryn. Ekornes hadde fått hand om retten til Sacco-sekkee gjennom eit svensk datterselskap, ifølgje NRK.

Bjørn Aage Haugen i Innvik Holding seier Sacco of Norway har vidareutvikla Sacco-sekken, med fleire fargar og storleikar. Selskapet har også utandørsversjonar av sekken.

Kjem frå Italia
Sekken blei utvikla av dei italienske designarane Cesare Paolini, Franco Teodoro og Piero Gatti og lansert i 1968.

Konstruksjonen er enkel, ein sekk full av små kuler i ekspandert polystyren.

I Noreg hadde sekken si første stordomstid på 80-talet.

Mest lønsam
Innvik Holding har fleire aksjonærar, med Bjørn Aage Haugen som største eigar.

I fjor var heileigde Sacco of Norway relativt det mest lønsame selskapet under Innvik Holding-paraplyen (sjå tabell).

Det klart største selskapet under Innvik Holding er møbeltekstilprodusenten Innvik, som har fabrikk og hovudkontor i Innvik. Innvik Holding eig 70 prosent i selskapet, resten av den danske tekstilprodusenten Kvadrat.

Investerer for vekst
I fjor sto fabrikken stille i omlag heile andre kvartal, på grunn av svikt i etterspørselen etter at koronaepidemien kom. Marknaden tok seg kraftig opp etter sommaren, men det var ikkje råd å ta att det tapte.

I fjor sa styret i det 131 år gamle selskapet ja til å utvide dagens fabrikkbygg frå 4200 til 5500 kvadrameter, og investere i nytt produksjonsutstyr.

I alt er det snakk om ei investering på 50 millionar kroner som skal gjere det råd å doble produksjonskapasiteten i fabrikken samanlikna med 2019.