Krev at verfta ryddar opp

Arbeidsminister Marte Mjøs Persen krev at verftsindustrien ryddar opp etter avsløringane om manglande kontroll med underleverandørar hos skipsverfta.

Etter at Arbeidstilsynet gjorde tilsyn ved åtte verft i Møre og Romsdal, og fann grove brot på arbeidstid, minsteløn og registrering av tilsette.

– Det er heilt uakseptabelt. Vi skal ikkje ha sånne tilstandar i norsk arbeidsliv. I Norge er det norske løns- og arbeidsvilkår som skal gjelde og arbeidsgivar har ein heilt klar plikt til å følgje opp dette, seier Persen til NRK Møre og Romsdal.

Ilagt milliongebyr
Statsråden legg til at ho er glad for at A-krimsamarbeidet mellom Arbeidstilsynet, skatteetaten og politiet har avdekka dei kritikkverdige forholda.

Heile 167 pålegg blei gitt til underleverandørane i samband med aksjonen som gjekk føre seg i 2020 og 2021. Så langt er det ilagt fire gebyr på mellom 42.000 og 1,2 millionar kroner – og det kan bli fleire.

Vard-konsernet opplyste tysdag at dei sette i verk strakstiltak og svartelista fleire underleverandørar, så snart dei blei gjort merksam på forholda.

Meiner kontrollen ikkje har vore god nok
Eit sentralt mål ved aksjonen har vore å hjelpe verfta til å betre sin eigen internkontroll, slik at dei betre kan førebygge kriminalitet i framtida.

Fungerande leiar Henrik Dalelid Vedde i Maritimt Forum Nordvest gjesta studioet til kanalen i Ålesund. Han meiner avsløringane svekkar omdømme til verftsbransjen, men har tiltru til at bedriftene vil gjere det som er nødvendig for å følge opp.

Også NHO-direktør Espen Remme og leiar Stein Lier Hansen i Norsk Industri reagerer på resultata av tilsyna. Hansen seier til NRK at dei viser at verftsindustrien ikkje har hatt god nok kontroll på rutinane.