LO bryt samarbeid med arbeidsgivarane

NPK-NTB-Kenneth Kandolf Haug: LO bryt samarbeid med arbeidsgivarorganisasjonane inntil vidare, på grunn av det dei reknar som ein uærleg prosess før brotet i IA-forhandlingane.

– Åtferda under forhandlingane, lekkasjar frå innsida av forhandlingsrommet, forsøk på å ekskludere LO frå prosessane i slutten av forhandlingane og at NHO-sjefen etter forhandlingane gjekk ut og avlyste partssamarbeidet i pressa, utan førre prosess. Det er eit brot på alle samarbeidstradisjonar. Det opplever vi som ekstremt uærleg, det er eit grovt tillitsbrot, seier LO-leiar Peggy Hessen Følsvik i ei pressemelding.

Følsvik understrekar at det er eit mellombels brot, samtidig som ho går til angrep både på arbeidsgivarorganisasjonane og dei andre arbeidstakarorganisasjonane. LO-leiaren meiner dei vart ståande utanfor forhandlingane om ein revidert tekst, medan dei andre hovudorganisasjonane var med.

– Vi har rett og slett vorte sette på gangen, seier ho på eit pressetreff måndag ettermiddag.

NHO overraska
NHO synest det er synd og kallar det overraskande at LO bryt samarbeidet med dei og dei andre arbeidsgivarorganisasjonane mellombels.

– NHO står klar til å ta opp att samarbeidet når LO ønskjer. Vi har ein lang tradisjon med å samarbeide, også når det er saker vi er usamde om, seier NHO-leiar Ole Erik Almlid i ei pressemelding.

Bakgrunnen for at LO no bryt samarbeidet med NHO, KS, Spekter og Virke er at det vart brot i forhandlingane om IA-avtalen (Inkluderande arbeidsliv-avtalen) 4. desember. Der stilte LO og NHO motstridande ultimatum om sjukelønn, og klarte ikkje å komme fram til eit kompromiss.

Bilaterale samarbeid
Samtidig legg Følsvik også til at LO vil gjennomføre bilaterale samarbeid med alle arbeidsgivarorganisasjonane.

– Trepartssamarbeidet er viktig for oss, og vi held fram med å stille i dialog som regjeringa inviterer til. Vi vil naturleg nok også gjennomføre lønnsforhandlingar, arbeidsrettslege og avtalemessige tvistemøte og bistand til medlemmene. Vi skal ta vårt ansvar for rettane til medlemmene. Vi står også framleis ved hovudavtalen, seier LO-leiaren.

IA-avtalen har som mål å få ned sjukefråværet og redusere fråfall frå arbeidslivet. Dagens avtale går ut ved årsskiftet. LO kravde at sjukelønnsordninga vi har i dag blir også freda dei neste fire åra, medan arbeidsgivarane ville frede i 18 månader. På så godt som alle andre spørsmål melde Følsvik at partane var i mål.

LO har fått kritikk
Akademikerne-leiar Lise Lyngsnes Randeberg har uttalt at LOs versjon av historia ikkje stemmer. Ho sa 4. desember at det var LO som kontant sa nei til eit forslag som freda sjukelønnsordninga i perioden, mot å diskutere varigheita til avtalen.

 – LO hevdar at dei forsvarer sjukelønnsordninga, men i realiteten set dei han i spel. Det at vi ikkje har ein IA-avtale rammar først og fremst arbeidstakarane. Vi er også skuffa over at arbeidsministeren kasta korta etter press frå LO, sa Randeberg.

Følsvik fekk måndag spørsmål om LO kunne gjort noko annleis, men står på sitt. 

– Det er ikkje så lett å sjå at vi kunne gjort noko annleis når vi blir sette på utsida, på gangen. Her er det snakk om fire organisasjonar på arbeidsgivarsida som har prøvd å komme dei tre andre arbeidstakarorganisasjonane i møte, og sett LO på gangen. Då er det ikkje lett å vere konstruktiv.