Må nok ei runde i retten mot Tersan

Til våren må nok ein gong eit Langset-selskap møte i retten i kjølvatnet av innreiingsoppdraget Norwegian Marine Interior (NMI) hadde på Havila Kystruten-skipa i Tyrkia.

I slutten av april er det Las As som må møte i Møre og Romsdal tingrett som følgje av søksmål frå eit av Tersan-verftet sine selskap. Bakgrunnen er at partane rauk uklare om innreiinga av skipa og kontraktane blei kansellert.

Las As er eigd av Langset-familien, men det er ikkje lengre drift i selskapet.

I Langset Group hadde konsernet solid auke i ordrebøkene i fjor, og ventar «god vekst i åra framover», fortalde nyleg konsernsjef Andreas Lindaas Lie til NETT NO.

– Ingenting å hente
Styreleiar Leif Magne Langset i Las As legg ikkje skjul på at han helst skulle nytta tida på andre ting enn rettstvisten.

– Det er eigentleg heilt meiningslaust. Saka har berre taparar, NMI er konkurs og det er ingenting å hente, seier han til NETT NO.

I førre runde fekk Langset-selskapet medhald frå retten i at dei kunne legge fram motkrav, men i avgrensa grad.

– Vi kan legge fram innseiingar på om kva utstyr som er levert og storleiken på beløpet, seier Langset.

Krav på kring 75 millionar
Striden har allereie vore ei runde i retten for å avklare korleis ein garantiavtale med morselskapet skulle tolkast.

Neste runde vil i hovudsak dreie seg om storleiken på kravet. Då saka var oppe i Møre og Romsdal tingrett i 2022, meinte Tersan dei hadde krav på kring 6,2 millionar euro.

Striden var ikkje avgjort då selskapet gjekk konkurs i haust og det tyrkiske verftet har levert inn eit krav på nær 6,5 millionar euro – eller kring 75 millionar kroner til buet.

Motkrav må fremmjast i Ukraina
Det høyrer med til historia at NMI hadde motkrav som oversteig kravet frå det tyrkiske verftet

Men om Las-selskapet skulle gjort det kravet gjeldande, måtte det skjedd ved ein domstol i den ukrainske hovudstaden Kyiv. Grunna Russlands invasjon av landet, er det naturleg nok ikkje mogleg.

Langset fortel at det gjer saka spesiell og ekstra krevjande.

Hovudforhandlingar i april
Rettssaka om garantikravet vil gå i Molde og det er sett av tre dagar frå 23. april til hovudforhandlingane.

Las As er representert ved Erik Wold frå Molde-firmaet Wold & Co, medan Tersan Tersanecilik Sanayi ve Ticaret er representert ved Norman Hansen Meyer frå advokatfirmaet Schjødt.

Les meir om bakgrunnen under: