Meir krisehjelp til ledige, bedrifter og frilansarar

(NPK-NTB): Dei mellombelse reglane for dagpengar og kompensasjonsordninga for sjølvstendige og frilansarar blir forlengde ut januar 2022.

Det var opphavleg lagt opp til at fleire av tiltaka berre skulle vare ut året, men desse blir no forlengde, opplyser regjeringa i ei pressemelding onsdag.

– Nye smitteverntiltak betyr ny uvisse for arbeidsmarknaden. Det er derfor nødvendig å forlengje ordningar slik at folk utan jobb eller oppdrag, blir varetekne, seier arbeids- og inkluderingsminister Hadia Tajik (Ap).

Meir hjelp til næringsdrivande og frilansarar
I tillegg til forlenging av dagpengar for ledige og kompensasjonsordninga for sjølvstendig næringsdrivande og frilansarar, blir òg perioden med fritak frå lønnsplikt under permisjon forlengd slik at permitterte beheld dagpengane ved permittering ut over 1. januar.

Ordninga med dagpengesats på 80 prosent kompensasjon for den delen av dagpengane som er under tre gonger grunnbeløpet, blir òg forlengd.

Dessutan kan ein ledig jobbe opp til 60 prosent av vanleg arbeidstid før dagpengane fell bort, mot normalt 50 prosent.

Særreglane for lærlingar blir òg ført vidare, slik at lærlingar som framleis er i ordninga, kan få dagpengar ut januar.

Samtidig blir det jobba på høggir med straumtiltak som skal nå breiare ut. Onsdag vart bustøtta og sosialhjelpsramma foreslått auka.

For å hjelpe nordmenn med straumrekninga vil regjeringa auke bustøtta med 1.500 kroner i månaden og auke sosialhjelpsbudsjettet.

– Vi foreslår å auke bustøtta kraftig gjennom vinteren. Det gjer at vi raskt når ut til mange av dei med dårlegast råd allereie før jul, slik at dei får handtert straumkostnadene, seier kommunalminister Bjørn Arild Gram (Ap) til NRK.

Regjeringa foreslår at bustøtta skal aukast med 1.500 kroner frå desember til mars. I tillegg kjem 150 kroner per person som bur i bustaden. Tiltaket vil koste 500 millionar kroner til saman, skriv NRK.

– Eit førstetiltak
Sosialhjelpsmottakarar som ikkje får bustøtte, skal få ein eigen pott på 100 millionar.

– Dette er eit førstetiltak for å hjelpe folk med høge straumprisar. Derfor foreslår vi å auke bustøtta kraftig gjennom vinteren. Det gjer at vi raskt når ut til dei med dårleg råd allereie før jul, seier Gram til NTB.

– Med rask behandling i Stortinget i løpet av få dagar rekkjer vi utbetaling allereie i desember. Det er viktig for oss, seier han.

Under 100.000 nordmenn rett på støtte
NRK skriv at under 100.000 nordmenn har krav på bustøtte. Inntektsgrensa er så låg at mange med låg inntekt i Noreg ikkje har krav på bustøtte.

– Men vi vil foreslå fleire tiltak for å nå eit breiare lag av befolkninga. Det blir jobba på høggir for å raskt fremje tiltak. Det er mange som slit med høge straumrekningar for tida, seier kommunalministeren.

Gram seier at ein kan vente seg «kraftfulle tiltak» i tida framover. Når tiltaka er klare og kva dei går ut på, er ikkje klart. Ifølgje NTB sine kjelder vil breiare tiltak leggjast fram i løpet av veka.

Forslaget på onsdag vil òg gjelde for bustøttemottakarar i Midt-Noreg og Nord-Noreg. Tidlegare i haust vart det gitt nærare 3.000 kroner i ekstra bustøtte til personar busett i Sør-Noreg sidan straumen var dyrast der.

Opposisjonen krev meir
Frp-leiar Sylvi Listhaug er tydeleg på at forslaget på onsdag til 600 millionar kroner ikkje held. Ifølgje Frp-leiaren tener staten opp mot 30 milliardar kroner ekstra på dei høge straumprisane.

– Det er ubegripeleg at dei har somla i dagevis og kjem med dette. Det er svært mange vanlege folk som blir ramma knallhardt av dei rekordhøge straumprisane og som er redde for at det blir vanskeleg å betale straumrekning og få råd til å feire jul, og som ikkje får hjelp av regjeringa, seier Listhaug til NTB.

Også Høgre-nestleiar Tina Bru er skuffa.

– Dette er tiltak dei kunne gjort for fleire veker sidan. No må dei faktisk gjere som dei har lova og komme med ei løysing som monnar for småbarnsfamiliane og studentane, seier ho.

Raudt kallar tiltaka ei fattig trøyst.

– Det er altfor lite og treffer altfor få. Det er ein hån at dei har somla for å få på plass noko så stussleg som treffer så få, seier Sofie Marhaug.

Kraftig auke i straumprisen
Straumprisane har denne vinteren auka kraftig, og spotprisen har dei siste vekene sett fleire nye timerekordar. Det har gjort at straumrekningane til nordmenn har vorte langt høgare.

Årsakene er mellom anna høge gassprisar, som påverkar straumprisane i heile Europa. Dette slår spesielt inn i Sør-Noreg, som er meir eksponert for europeiske prisar på grunn av utanlandskablane.

På toppen av dette kjem høge prisar på CO2-utslepp. Samtidig ligg fyllingsgrada i vassmagasina i Noreg betydeleg under normalt nivå. Det har òg vore lite vind i Noreg og Europa, som dermed har gitt mindre vindkraft.

(©NPK)