Mittet slo alle rekordar

Mittet har historie tilbake til 1946, men i fjor hadde bedrifta sitt beste år sidan oppstarten.

Driftsinntektene auka kraftig - med heile 66,5 millionar kroner etter ein nedtur i 2021.

Men resultatet før skatt auka også, frå 16,7 millionar kroner i 2021 til 41,4 millionar kroner i fjor. Dette gjer at eigarane kan fordele eit utbyte på 26 millionar kroner for fjoråret.

(saka held fram etter tabellen)

Tre fabrikkar
Mittet produserer tekstilar til ulike formål, i hovudsak basert på syntetiske tekstilfibrar. Selskapet har fabrikkar i Vegsund og Mauseidvåg, i tillegg til ein fabrikk i sitt heileigde selskap i Lithauen.

Selskapet er i dag organisert i fire forretningsområde; Bygg & ventilasjon, Møbel, Tekstil og Spesialprodukt, der ein frå fabrikken i Mauseidvåg leverer tekstilar til møbelindustrien, medan produkta til bygg og ventilasjonsbransjen foregår ved hovudfabrikken i Vegsund. Ved fabrikken i Lithauen, og ved leigeproduksjon i Estland, foregår eksport av tekstil- og spesialprodukt.

NATO-sko
Blant anna er Sula-bedrifta store leverandørar ventilasjonsfilter og av pels til målarrullar, i tillegg til ein over fleire år har levert overtrekkssko til NATO.

I fjor var det inntektene frå eksport som auka kraftig, frå 62,2 millionar kroner i 2021 til 130,3 millionar i fjor.

Lithauen-bedrifta leverer også positivt, og hadde eit driftsresultat på 2,7 millionar kroner i fjor.

Skjerpa konkurranse
Styret skriv i årsrapporten at ein forventar moderat vekst i år, men at det er skjerpa konkurranse, spesielt på filter. For å oppretthalde lønsemda, vil ein rasjonalisere og investere i nytt utstyr, blant anna automatar.

Styret skriv også at ein har gjort tiltak for å redusere straumforbruket, blant anna gjennom samarbeid med Tafjord Marked og Enova, men at ein vil gjennomføre ytterlegare tiltak.

Hovudaksjonærar i Mittet er Reidar og Irene Mjelde med 51 prosent. I tillegg eig Monica Lervik Mittet, Marianne Havnevik Mittet og Wenche Mittet til saman 44 prosent, medan Jon Aaland eig 5 prosent.