![Møreaksen innfelt helge orten lena landsverk sande illustrasjon statens vegvesen 11](/imager/images/327578/møreaksen-innfelt-helge-orten-lena-landsverk-sande-illustrasjon-statens-vegvesen-11_859d8f71e51cdcc79197ecd3648d156c.webp)
Møreaksen inne i transportplanen
– Ei historisk satsing for Møre og Romsdal, seier Helge Orten (H) som trur på oppstart innan to-tre år.
Stortingsrepresentant Helge Orten (H) kunne saman med Harry Valderhaug (Krf) og Lena Landsverk Sande (V) stadfeste at Møreaksen er inne i forslaget til komande Nasjonal Transportplan (NTP) for 2022 til 2033.
– Dette er ei historisk satsing for Møre og Romsdal at E39 frå Ålesund til Molde ligg inne i Nasjonal Transportplan, innleia Orten under eit digitalt møte med pressa.
2,5 mrd. i første periode
Strekninga inkludert fjordkryssinga Møreaksen, er anslått å koste 24 milliardar etter at Statens vegvesen har kutta kostnadene. Ein del av dette skal betalast med bompengar.
Orten fortel at prosjektet ligg inne med 2,5 milliardar kroner i første seksårsperiode, medan dei resterande statlege løyvingane skal kome i siste halvdel av planperioden.
– Eg er utruleg glad for at Høgre, saman med KrF og Venstre, har klart å få dette på plass, la Orten til.
Det er motkrefter, men vi håpar vi kan samlast i regionen
Trur på oppstart i 2023/24
Statens vegvesen har anslått at det er mogleg å starte opp prosjektet i 2023/24, og Orten meiner fjordkryssinga blir det viktigaste å starte med.
Om alt går etter planen slik regjeringspartia ønsker, kan strekninga vere klar til å takast i bruk kring 2030.
Det er venta at forslaget for transportplanen som skal gjelde fram til 2033, blir lagt fram neste veke.
Avhengig av fleirtal
Det står att å få fleirtal for forslaget i Stortinget. Her har allereie Framstegspartiet varsla at dei ikkje vil støtte ein transportplan som inneheld Møreaksen.
– Det er motkrefter, men vi håpar vi kan samlast i regionen, kommenterte Harry Valderhaug undervegs.
– Vi har hatt eit godt samarbeid med Frp, så vi kjem nok til å sette oss ned å snakke med Frp om denne transportplanen. Elles er det i utgangspunktet eit breitt fleirtal for dette prosjektet i Stortinget. Det ventar eg at det framleis er, la Orten til.
Eksportvegen til Nye Veier
I førre veke blei det klart at ansvaret for å bygge E136 mellom Dombås og Vestnes, er flytta over til det statseigde selskapet Nye Veier.
Det skal ikkje byggast ny veg, men strekninga skal mellom anna bli breiare, få krabbefelt i motbakkane og tryggare avkøyrsler.
E39 mellom Volda og Ålesund med Hafast er ikkje inne med midlar i transportplanen, men Harry Valderhaug trur grønt lys for Møreaksen kan påverke positivt.
– I høve til Hafast er det viktig for regionen at dette arbeidet blir sett i gong, sa Valderhaug.
Publisert: 10.03.2021 11:18
Sist oppdatert: 11.03.2021 17:29