- Nesten vemodig at skuta er ferdig

- Det har vore mange nedturar og frustrerande stunder. No er det likevel nesten vemodig å sjå at skuta er ferdig.

- Og for eit fantastisk skip det har vorte.

To kanselleringar
Det seier salsdirektør Lars Conradi Andersen i Hav Group. Sals- og designavdelinga har jobba med prosjektet frå starten i 2014, då islandske Fafnir Offshore bestilte skipet frå Havyard Leirvik.

Men slik gjekk det ikkje. Kontrakten vart kansellert, skroget vart først liggjande lenge i Leirvik, før det vart slept til Kleven for ferdiggjering for canadiske Atlantic Towing. Men også denne kontraktren vart kansellert, heilt til Herøy-selskapet Rem Offshore kom inn, overtok skoget og bygde skuta om til eit spesialskip innan offshore vind.

For å få til denne løysinga, strekte blant anna Eksfin og bankane seg langt.

Nye prosjekt
Lars Conradi Andersen seier at det har vorte eit fullblods offshore vindskip, faktisk det første som er ferddigjort på eit norsk verft til ein norsk reiar.

- Vi har saman fått til fantastisk gode løysingar.

Samstundes er skipet det tiande havvindskipet med Hav-design. Lars Conradi Andersen trur det vert fleire.

- Vi jobbar med fleire spennande prosjekt.

- I tillegg ventar vi spent på kven som får oppdraget med den nye hydrogenferja over Vestfjorden.

15 år gamal gudmor
Laurdag vart Rem Energy døypt.

Gudmor var 15 år gamle Birthe Marie Remøy.

Green Yard Kleven-direktør Hans Jørgen Fedog rosa dei tilsette på verftet.

- Det har vore utfordrande å gjere båten ferdig midt under ein pandemi. Men dei tilsette og gjort ein kjempejobb, og saman med våre samarbeidspartnerar lukkast vi.

Rem Energy er samstundes den tjuande båten frå Kleven til Rem-reiarlaget.

Båten er 89,7 meter lang, 19,6 meter brei og er innreidd for 99 personar.

Rem Offshore har kontrakt i vel fire år med tysk-spanske Siemens Gamesa, der Rem Energy skal vere hotellskip og drive vedlikehaldsarbeid på vindparkar i Tyskebukta.