NHO ventar høg rente ut 2027

NPK-NTB-Amalie Vadla.: Arbeidsmarknaden er i betring, folk har betre råd, men prisveksten er framleis høg. Derfor er det behov for høg rente i alle fall ut 2027, skriv Næringslivets Hovedorganisasjon (NHO) i rapporten Økonomisk overblikk.

I tråd med sentralbanken sin eigen prognose blir det anslått eitt rentekutt i året dei neste tre åra, og at styringsrenta er på 3,5 prosent i 2027.

NHO grunngir renteanslaget med at norsk økonomi har utvikla seg betre enn venta.

– Sidan juni har vi fått eit litt meir optimistisk syn på den økonomiske situasjonen. Trass i tolltruslar og konfliktar verkar verdsøkonomien meir motstandsdyktig enn vi såg for oss. Heime er det også litt friskare enn vi såg for oss, seier NHOs sjeføkonom Øystein Dørum til NTB.

Han viser til at veksten i økonomien har skote fart, mellom anna driven av forbruket i hushalda.

Byggjebransjen slit framleis
Stemninga er likevel ikkje i taket hos NHOs medlemsbedrifter.

I tredje kvartal vurderte nesten like mange bedrifter nosituasjonen som god, som talet på bedrifter som rekna den som dårleg. Og endå fleire vurderer marknadssituasjonen dei neste seks månadene som dårleg.

– Vi hadde endå litt fleire pessimistar tidlegare, så der er det ei slags betring, seier Dørum.

Han trur pessimismen i stor grad er farga av bedriftene i industrien og byggjebransjen. Og det er særleg Norsk Industri og NHO Byggnæringen som er negative.

I industrien kjem det truleg av usikre tider utanlands, medan i byggjenæringa er det framleis krevjande tider, mellom anna med eit stort etterslep på bustadbygging.

– Bygg- og anleggsbransjen har falle og kjem til å bruke tid på å komme seg. Medan for industrien, som er særleg eksportretta, er det ein uviss situasjon, seier Dørum.

Mykje uvisse globalt
Sjølv om verdsøkonomien har vist seg robust i ei tid med mykje uvisse, særleg knytt til USAs president Donald Trumps tollpolitikk, er det likevel mykje uvisse.

- I fleire land, og særleg i Tyskland, er veksten blodfattig. Høg statsgjeld og auka utgifter til forsvar og aldring begrensar handlingsrommet i budsjetta. Meir polarisering og skjøre politiske koalisjonar gjer det samtidig krevjande å finne handlingsrom gjennom reformer og budsjettkutt, skriv NHO i rapporten.

Og i USA, den største økonomien i verda, har arbeidsløysa auka og jobbveksten vore laber, ifølgje rapporten. NHO påpeikar at høg prisvekst i tillegg minkar rommet for rentekutt.