Nytt minusår på børsen for Nordvestlandet

Hexagon Composites blei årets og dagens børsvinnar på Nordvestlandet, med ein kursauke på 37,69 prosent i løpet av 2022 og ein kursauke på 3,14 prosent i dag.

Selskapet lagar tankar og system for bruk av natur- og biogass som energikjelde. Dei er óg største aksjonær i Hexagon Purus, som lagar tilsvarande produkt for hydrogen. For Hexagon Purus blei året ein nedtur på børsen, med eit kursfall på over 46 prosent.

Hovudkontora til begge selskapa har adresse i Ålesund. Knut Flakk er styreleiar i Hexagon Composites, og og han og familien eig 12,85 prosent i Hexagon Composites gjennom fire ulike selskap.

Kursauke har også industri- og ingeniørselskapet Endúr - som mellom anna omfattar Artec Aqua i Ålesund, offshorereiarlaget Golden Energy Offshore Services, skipsdesign- og utstyrsprodusent Hav Group og industriselskapet Eqva (tidlegare Havyard Group).

Fall tre milliardar
Den samla verdien av dei børsnoterte selskapa på Nordvestlandet fall med tre milliardar kroner i 2023.

Då er også verdien av mobiltelefonselskapet Nortel rekna med. Nortel vart seld til konkurrenten Unifon for 517 millionar kroner i 2023.

Det er eit fall på 9,8 prosent. Hovudindeksen på Oslo Børs er opp 9,89 prosent i år.

Mindre fall enn i 2022 og 2021
2023 er tredje år på rad med verdifall for dei børsnoterte selskapa på Nordvestlandet, men eit mindre fall enn i 2022 og 2021.

I 2022 var verdifallet 6,1 milliardar kroner. Det var ein nedgang på 17 prosent. Hovudindeksen på Oslo Børs fall til samanlikning 1,03 prosent i 2022.

2021 var eit verre børsår enn 2022 for selskapa på Nordvestlandet. Børsverdiar for 21 milliardar blei borte i løpet av 2021, og verdifallet var på 38 prosent. Hovudindeksen steig 20 prosent i 2021.

10 selskap i minus
10 selskap frå Nordvestlandet enda med nedgang i aksjekursen i år.

Aller verst gjekk det med Havila Kystruten, som fall over 90 prosent. I løpet av året fekk selskapet alle sine fire skip i drift. Men reiarlaget måtte også gjennomføre ei kapitalutviding på 758,7 millionar kroner i sommar, og ein påfølgande reparasjonsemisjon på 22,6 millionar kroner. Kapitalutvidinga er hovudårsaka til at kursfallet blei så stort som det blei.

I fjor var offshorereiarlaget Havila Shipping børsvinnar i nordvest, med ein kursauke på nesten 200 prosent.

I år har selskapet falle over 50 prosent. Ei årsak er truleg at långivarar brukte retten sin til å kreve sal av tre fartøy. Havila Shipping gjekk dermed glipp av forventa komande inntekter og verdistiging på fartøya. Refinansieringsavtalen frå 2020 sikra långivarane rett til å kreve sal, og det gjorde dei - mot reiarlaget sin vilje.

Færre selskap
I løpet av 2023 har Nortel blitt kjøpt og tatt av børs. Statt Torsk er i ferd med å slå seg saman med Vesterålen Havbruk, og har nyleg sendt søknad om å bli stroke frå notering på børsen.

Eqva, tidlegare Havyard, vedtok på ei ekstraordinær generalforsamling i romjula at hovudkontoret skal flyttast frå Fosnavåg til Kvinnherad. Selskapet selde tidlegare i år skipverftet Havyard Leirvik og all verksemda til selskapet er no i Sunnhordland og Bergen-området.

Utan hovudkontoret i regionen har ikkje selskapet lengre noko tilknytning til Nordvestlandet - og NETT NO kjem til å ta selskapet ut av lista over børsnoterte selskap i vår dekning.

Vi skal ikkje så mange år attende før både skipsbyggingskonsernet Vard, møbelprodusenten Ekornes og Fjord1 var børsnoterte selskap - Vard i Singapore, Ekornes og Fjord1 i Oslo.

Men i åra 2020-2021 fekk Nordvestlandet fleire nye selskap på børsen; Hexagon Purus (2020), Salmon Evolution (2020), Romsdal Sparebank (2020), Nortel (2020) Havila Kystruten (2021), Norva 24 (2021), Statt Torsk (2021), Arctic Bioscience (2021) og Hav Group (2021).