Nytt superår for Gjerdsvik-selskap

Gjerdsvika-baserte Sanco Holding auka inntektene i 2020, i eit år der dei fleste seismikkselskap sleit tungt.

Driftsinntektene kom opp i 606,3 millionar kroner, som er det høgste nokon gong.

Driftsresultatet enda på solide 174,2 millionar kroner, som er det nest beste resultatet selskapet har hatt.

Selskapet har ti fartøy, både reine seismikkskip og støttefartøy for seismikk.

Nyleg overtok Sanco seismikkskipet Neptune Naiad frå Axxis Geo Solutions som ein del av restruktureringsavtalen for Axxis.

Trur på bra 2022
Sanco-direktør Ivar Slettevoll seier at marknaden er svak for tida, og selskapet har tre skip i opplag.

- Det er særleg skytebåtmarknaden som sviktar, men vi ser vi teikn på at aktiviteten vil ta seg noko opp utover hausten, seier Slettevoll.

Han seier at 2021 blir eit vesentlig svakare år for selskapet både omsetningsmessig og resultatmessig.

- Det ser ut som 2022 vert eit meir normalt år då vi trur på at koronaen er kome nokolunde under kontroll i form av vaksinering og at oljeprisen allereie er rimeleg grei slik den er.

Familiedominert
Sanco Holding har ein samla eigenkapital på 900 millionar kroner og ei langsiktig gjeld på 717 millionar.

Ivar Slettevoll starta selskapet i 1996 saman med kona Bjørg og broren Bjarte Slettevoll. Familien er framleis dei dominerande eigarane.

Les meir om selskapet her.