Nytt år i motbakke for IP Huse

Årsresultatet for 2020 viser at Harøy-bedrifta IP Huse, fekk et nytt tøft år i fjor. Trass i ei betring i driftsresultatet på kring 50 millionar, blei det eit nytt underskott.

IP Huse-sjef Morten Hopland, har likevel rett i det han fortalde NETT NO mot slutten av fjoråret – at 2020 blei «betydeleg betre» enn året i forvegen.

Bedrifta som i hovudsak har levert vinsjar til ankerhandteringsskip og system for å forankre boreriggar, har slitt tungt i kjølvatnet av offshorekrisa.

Auka omsetning – færre tilsette
Etter at inntektene blei meir enn halvert i 2019, snudde dei seg mot vasskraft- og subseamarknaden. Grepet ga auke i omsetninga på knappe 30 millionar i fjor (sjå tabell under).

Selskapet har likevel vore nøydd til å bruke både permitteringar og oppseiingar i løpet av det siste året for å tilpasse seg utsiktene framover.

Bedrifta hadde i 2017 140 tilsette. Dei siste åra har dei vore kring 50 færre, og ved inngangen til 2021, var dei 97 personar, fordelt på 92 årsverk.

– Situasjonen er framleis vanskeleg
IP Huse sel og marknadsfører produkta sine gjennom Kongsberg Maritime i Brattvåg, og marknaden var krevjande gjennom heile fjoråret, skriv leiinga i årsrapporten.

– Situasjonen er framleis vanskeleg, og bedrifta vurderer fortløpande korleis den best skal tilpasse seg marknadssituasjonen, heiter det.

Dei tradisjonelle marknadene i offshore- og maritim verksemd, var i svak betring i fjor vår. Koronapandemien har gjort at den utviklinga har stoppa opp.

Har hatt arbeid til i haust
På vasskraft- og subseamarknaden jobbar dei som underleverandør til andre samarbeidspartnarar enn Kongsberg.

Til saman har det gitt arbeid til heile arbeidsstokken til no i haust. Etterpå har dei overkapasitet, går det fram av årsmeldinga.

I augst blei det også kjent at IP Huse skal lage dei største baugvengane til Wavefoil ved sitt anlegg.