Nytt år i vekst - og pluss

2021-resultatet til Brunstad er det beste på meir enn fem år for møbelprodusenten frå Sykkylven.

Inntektene held fram å peike oppover, etter ei allereie solid auke i 2020 til 100 millionar. Omsetninga i fjor enda på 127 millionar kroner.

Lønnsemda held seg også på nivå med året i forvegen, med eit resultat før skatt på meir enn fire millionar (sjå tabell under).

Meir å gjere under pandemien
Det er framleis litt opp til «glansdagane» i 2008, då Brunstad omsette for 180 millionar og hadde tosifra millionar i overskot.

Samtidig er det andre år på rad med overskot og god økonomi, etter nokre tøffe år med underskot i 2018-2019.

Men Sykkylven-bedrifta er mellom møbelprdusentane som har merka solid trøkk under koronapandemien. Under pandemiperioda lanserte dei også fire nye stolmodellar – før dei kom med enno nokre nye modellar i fjor.

Har teke grep
Brunstad-sjef Ronny Bjøringsøy fortalde til NETT NO i fjor at dei i 2020 samla stolproduksjonen i Sykkylven og sofaproduksjonen hos søsterselskapet Violante Mööbel i Estland. Dei tok også andre grep for å drive meir effektivt.

Summen av dette slo positivt ut på lønsemda ifjor, ifølgje Bjøringsøy.

Eigenkapitalen var på drygt 26 millionar og gjelda på 25 millionar, ved utløpet av året.

Brunstad er eigd av Hadi Invest (51,2 prosent) og av Hadi Invest sitt datterselskap Brunstad Invest (48,8 prosent). Hadi Invest er eigd av Olaug Strand Brunstad, og er morselskap i konsernet.