Opptur for Brunstad

Fram til årsskiftet ventar Brunstad-sjef Ronny Bjøringsøy å tilsette mellom fem og ti fleire folk i produksjonen i fabrikken i Sykkylven. Brunstad har i dag 52 tilsette i møbelbygda.

Så langt i år ligg salet 30 prosent over nivået frå same tid i fjor, og lønsemda ligg per i dag an til å blir mykje betre enn i 2020.

Det er verknaden av tiltaka for å auke lønsemda som gir full effekt i år, ifølgje Bjøringsøy.

Flytta sofaproduksjonen
Brunstad samla i fjor stolproduksjonen i Sykkylven og sofaproduksjonen hos søsterselskapet Violante Mööbel i Estland. Frå årskiftet starta selskapet å produsere skumplastputene til stolane sjølve, og har samordna oppgåver i administrasjonen.

Sidan koronapandemien kom har selskapet også lansert fire nye stolmodellar og kjem med ytterlegare nye modellar seinare i år.

Det er summen av dette som slår positivt ut på lønsemda i år, ifølgje Bjøringsøy.

Stolar står for omlag 60 prosent av driftsinntektene til Brunstad-konsernet, og Bjøringsøy ventar andelen vil auke.

Satsar på kontraktsmarknaden
Den verdsomfattande pandemien som kom i fjor, og smitteverntiltaka mot den, gjorde at nordmenn har måtte halde seg meir heime.

Det utløyste travel aktivitet med oppussing og fornying av hus og hytte, som blant andre møbelindustrien har nytt godt av.

For å motverke ein eventuell nedtur når koronaepidemien ebbar ut, aukar Brunstad satsinga på kontraktsmarknaden, der bedrifter, og offentlege etatar og verksemder er kundane.

Brunstad er eigd av Hadi Invest (51,2 prosent) og av Hadi Invest sitt datterselskap Brunstad Invest (48,8 prosent). Hadi Invest er eigd av Olaug Strand Brunstad, og er morselskap i konsernet.