Prisen på metanolsatsing har auka til inntil 4,5 milliardar

– Om alt går etter planen kan vi vere i gong med produksjon på Øyer i 2025, sa medgrunnleggar, medeigar og dagleg leiar Dag Nikolai Ryste i Glocal Green til NettNo i 2022.

No er målet til Ålesund-selskapet å vere i gang med produksjonen av metanol basert på trevirke og slam frå oppdrettsanlegg i 2029. Produksjonsanlegget skal ligge i Øyer i Gudbrandsdalen.

Dei berekna kostnadane har også auka. 

Prislappen har auka
Så seint som i fjor berekna Glocal Green at heile investeringa ville koste 3,2 milliardar kroner. No seier Ryste at den samla kostnaden kan bli på inntil 4,5 milliardar kroner.

– Vi får sjå kva skalering vi fell ned på, men ramma no, herunder å innfri modenheitskravet frå Statnett for (å få) 125 MW kraft i Øyer, tilseier at vi vil kunne produsere 150.000 tonn bio-e-metanol årleg, som også inneber ein produksjon av 15.000 tonn hydrogen, seier Ryste.

Ei slik utbygging vil gi det største produksjonsanlegget i Europa. Det er ikkje eit mål i seg sjølv, men for å kome i møte etterspørselen etter «millionvis av tonn berre i Europa», ifølgje Ryste.

Slik forklarar Glocal Green korleis anlegget skal fungere (ekstern lenke).

Skal produsere bio-e-metanol
I samarbeid med eit anna Ålesund-selskap, Norwegian Hydrogen, skal det også produserast hydrogen på tomta i Øyer. Hydrogen saman med CO2 og metanol blir såkalla bio-e-metanol. 

– Med tilførsel av hydrogen kan ein få utnytta all den grøne CO2-en i biomassen og meir enn doble volumet av grøn metanol ut. Kombinasjonen av bio og hydrogen på dette viset, gir i tillegg auka avgiftsfordel, seier Ryste.

Metanol basert på trevirke og fiskeslam er definert som drivstoff som ikkje gir auka CO2-utslepp, akkurat som for ved - fordi det er ein krinsløpsressurs som ikkje tilfører atmosfæren ny CO2. 

Hydrogen laga ved hjelp av straum frå fornybare energikjelder som vind- og vasskraft, er ein energiberar som heller ikkje gir CO2-utslepp.

Draghjelp frå EU
Glocal Green satsar per i dag mest på skipsfartsmarknaden, der det ifølgje Ryste er ein sterkt aukande etterspørsel.

CO2-avgifta i EU på bruk av fossilt drivstoff kjem på pluss-sida for Glocal Green.

– Det er ein veldig kompleks avgiftsstruktur, som vil premiere nullutsleppsdrivstoff som vårt, og tilseie ein alternativkost/betalingsvilje på 1350 euro per tonn eller meir, seier Ryste. 

Også den internasjonale skipsfartsorganisasjonen (IMO) arbeider med å få på plass reglar som skal gjere det dyrare å bruke fossilt drivstoff, for å stimulere til å ta i bruk drivstoff med mindre, eller utan CO2-utslepp. Om IMO-reglane vil harmoniserast med EU eller kome i tillegg er førebels uklart.

– Ei auka vitalisering rundt utsleppsregelverket, dets begrensningar og moglegheiter, inneber at vi med vårt produkt står overfor ein mykje større betalingsvilje enn vi gjorde for berre få månadar sidan, seier Ryste.

Bunkringsstasjon
For å sikre at potensielle kundar kan få tilgang til biometanolen Glocal Green skal lage, har selskapet stilt seg i spissen for å etablere ein fyllestasjon i Grenland Havn i Telemark. 

Dei har óg ambisjonar om å bygge fleire anlegg langs kysten.

Medan bruk av hydrogen eller ammoniakk på skip krev spesialanlegg, kan metanol brukast som drivstoff i motorar som også kan gå på diesel, såkalla dual fuel-motorar.

Det aukar fleksibiliteten for reiarane, som både kan redusere utsleppa sine og bruke skipa - også om metanol ikkje er tilgjengeleg. 

– I Noreg har det over år vore fokus på batteri, hydrogen og ammoniakk som dei einaste utsleppsfrie alternativa. Lite har skjedd grunna ulike utfordringar knytta til desse, og no må vi ikkje lenger la det «perfekte» kome i vegen for det gode. For mange applikasjonar kan kombinasjonen av metanol og batteri vere fornuftig, og som alt anna lar det seg kombinere med segl, som til saman gir ekstra positiv utteljing i avgiftsrekneskapet, seier Ryste.

Planlegg kapitalutviding
Glocal Green er i ferd med å installere eit pilotanlegg for å teste ut teknologien hos sin svenske samarbeidspartnar i Piteå i Sverige, med planlagt produksjonsstart neste år.

Selskapet har gjennomført to kapitalutvidingar og planlegg ein ny, tosifra millionemisjon i løpet av året, ifølgje Ryste.

Hans vurdering er at heile satsinga vil bli finansiert gjennom ein kombinasjon av kapitalinnhenting, offentleg støtte og lån, med ein normal eigenkapitalandel på 30-50 prosent.