Offshoreaksje under emisjonskurs

Klokka 12:18 tida fredag er kursen til Golden Energy Offshore Services nede i 7,78 kroner aksjen. Det er botnnotering for selskapet og eit fall på 20,61 prosent samanlikna med sluttkursen torsdag.

Det er også under kursen på åtte kroner, som er sett i kapitalutvidinga selskapet håpar å få gjennomført i løpet av dagen. 

Sidan årskiftet har kursen falle 60,31 prosent og selskapet er no verdsett til 195 millionar kroner på børsen.

Treng påfyll av pengar
Målet med dagens kapitalutviding er å hente inn 320 millionar kroner (31,7 millionar dollar).

Offshorereiarlaget i Ålesund treng påfyll i kassa og børsmeldinga om kapitalutvidinga fortel om eit selskap som har hatt knapt om pengar.

Betale kortsiktige lån
Meldinga fortel mellom anna kva kapitalutvidinga skal brukast til. 

Den oversikta ser slik ut; betale leverandørgjeld på omlag åtte millionar dollar, betale løn, bonus, feriepengar og arbeidsgivaravgift på to millionar dollar, betale likviditetslån frå KJA Partners på 7,5 millionar doller, betale i attende fire kortsiktige lån på i alt 6,8 million dollar (av dei 1,2 millionar dollar frå dagleg leiar Per Ivar Fagervoll), betale to millioner dollar for å dekke juridiske og finansielle transasjonskostnader og sikre omlag 5,4 millionar dollar til generelle føremål.

Selskapet har med andre ord lite att når alle krav er betalt. 

Reiarlaget planlegg også å å selje minst to av sine ni offshorefartøy.

Garanti frå storaksjonærarne
Dei to største aksjonærane har garantert for å delta med i alt 24,86 millionar dollar i kapitalutviding.

Dagleg leiar Per Ivar Fagervoll går inn med inntil 1,57 millionar dollar. I tillegg har andre aksjonærar indikert at dei vil gå inn med resten, ifølgje børsmeldinga.

Det betyr at selskapet får inn ny eigenkapital - også om ingen andre vil vere med.