Reiarlag flaggar heim fleire skip

(NPK-NTB): Sidan 2014 er det komme over 200 fleire skip i Norsk internasjonalt skipsregister (Nis). Det er ein auke på over 40 prosent.

I dei åtte åra er talet på skip i det norske registeret auka frå 522 til 735, skriv Finansavisen.

Ålesund på 2. plass
Bergen har suverent flest Nis-registrerte skip, 295. I tillegg er byen heimehamn for 144 skip i det ordinære registeret Nor. Dermed har den gamle hansabyen ein handelsflåte på 439 norskregistrerte skip.

Ålesund er på andre plass med 163 norskregistrerte skip, 39 i Nis og 124 i Nor. Ser ein berre på Nis-registeret, er det Oslo som kjem på plassen bak Bergen med 94 skip, følgt av Haugesund med 68.

– Støtte det maritime miljøet i Noreg
Blant dei som flaggar skipa sine heim til Noreg er seismikkselskapet PGS og Belships. Sistnemnde registrerer skipa sine i Egersund.

– Vi set norsk flagg på alle skipa som vi driv sjølve. Vi gjer dette for å støtte det maritime miljøet i Noreg og synest det er viktig å vere med og halde oppe Noregs posisjon, seier Belships-sjefen Lars Christian Skarsgård.

Bergen blir hjelpt av cruisereiar
Bergen blir hjelpt av skipsreiar Torstein Hagen som registrerer Vikings havgåande cruiseskip i byen.

– Viking Ocean Cruises gir store ringverknader i den norske shippingklyngja både i form av norske arbeidsplassar og gjennom cruisetrafikken langs norskekysten, seier seniorrådgivar Tone Olsen Risnes i Sjøfartsdirektoratet. Ho viser til at reiarlaget har rundt 70 kadettar om bord i skipa sine.

NIS-registeret vart oppretta i 1987 som eit alternativ til utflagging.

(©NPK)