Rekord på rekord for Marina Solutions

- Det ser veldig bra ut, seier Torgeir Iversen, dagleg leiar og største aksjonær i Marina Solutions om 2021.

Selskapet med hovudkontor og storparten av arbeidsstokken i Ørsta konstruerer småbåtanlegg og flytekaier og -moloar i betong og har også arbeidd seg inn i oppdrettsnæringa med eigenkonstruerte fôrflåtar i betong.

Selskapet har auka arbeidsstokken med to i år , og er no oppe i 20 tilsette.

- Det ligg an til ei omsetning på mellom 150 og 170 millionar kroner, seier Iversen om 2021. Så langt i år er det signert kontrakter for 120 millionar kroner. Det betyr at 2022 blir tredje år på rad med rekord i driftsinntekter.

I fjor passerte selskapet 100 millionar kroner i driftsinntekter, og fekk også si beste lønsemd så langt. (Sjå tabell)

Kapasitetsutfordring
Utfordringa i år blir å kunne levere raskt nok.

I dag blir betongkonstruksjonane støypt hos Ulstein Betong (som også er tredje største aksjonær med 14,8 prosent) og hos samarbeidspartnaren G-Bygg på Kyrkjsæterøra.

Iversen seier selskapet ventar vekst også i 2022 og vurderer å skaffe seg ytterlegare byggekapasitet.

Vekst i alle marknadar
Veksten kjem i fleire deler av marknaden, etter Iversen si vurdering. For få år sidan utgjorde oppdrettsmarknaden omlag fem prosent av driftsinntektene, i dag står den for omlag 30 prosent og er veksande.

Samstundes er Iversen optimistisk til utvikling i selskapet sine tradisjonelle marknadar, som er er småbåtanlegg og flytande kaianlegg. Selskapet arbeider og med kontraktar for flytekaier til cruiseskip, som kan bli store ordrar om dei går inn.