Sel Endúr-aksjar for 109 millionar kroner

Bjørn Finnøy, Bjørnar Flem og Victor Fiveland i Ålesund blei største aksjonær i industri- og ingeniørselskapet Endúr då dei selde Artec Aqua til Endúr i 2021.

Dei fekk 345 millionar kroner i kontantar og Endur-aksjar som då var verdsett til 345 millionar. Endúr-aksjane eig dei gjennom sitt felles selskap, Artec Holding.

Onsdag har Artec Holding seld to millionar aksjar i Endúr, til 54,50 kroner aksjen. Det betyr 109 millionar kroner til Artec Holding.

Les børsmelding her (ekstern lenke)

Salet reduserer Artec Holding sin eigarandel i Endúr frå 23,31 til 17,89 prosent. Artec Holding er framleis største aksjonær i Endúr etter salet.

Byggjer Salmon Evoluton-anlegg
Artec Aqua blei skipa av Finnøy, Flem og Fiveland i 2002.

Gjennom eigne investeringselskap eig dei ein tredjepart kvar av aksjane i Artec Holding.

Ålesundselskapet har spesialisert seg på å teikne og prosjektere landbaserte oppdrettanlegg og har mellom anna oppdraget med å bygge anlegget i andre byggesteg av Salmon Evolution sitt landbaserte oppdrettsanlegg i Indre Harøy i Romsdal.

Nye investeringar
I børsmeldinga står det at formålet med salet, sett frå Artec Aqua si side, er å bidra til å betre likviditeten i Endúr-aksjen, optimalisere eigen investeringsportefølje og bygge opp midlar til andre investeringar.

Artec Aqua skal framleis vere ein langsiktig eigar i Endúr, ifølgje børsmeldinga.

Tysdag ettermiddag var Endúr handla til 59 kroner på børsen. Det er 55,26 prosent høgare enn ved årskiftet, og like under årsrekorden på 61,9 kroner aksjer 12. september.

Då Endúr kjøpte Artec Aqua i januar 2021 var kursen 59,25 kroner aksjen.