Sentralbanken held truleg renta uendra ut året

(NPK-NTB): Noregs Bank held renta uendra på 4,5 prosent og varslar samtidig at det planlagde kuttet først vil komme neste år.

Men sentralbanksjefen signaliserer at nedgangen kan bli litt raskare enn ein har trudd.

Det var knytt mest spenning til kva sentralbanksjef Ida Wolden Bache ville seie om rentebanen i samband med renteavgjerda torsdag.

– Truleg held vi renta på 4,5 prosent ut året, sa ho.

Sjå pressekonferanse (ekstern lenke)

Styringsrenta har lege på dette nivået sidan desember i fjor. Neste år kan lånekundane vente seg ein nedgang. Wolden Bache seier tidspunktet for å kutte nærmar seg.

Noregs Bank antydar at styringsrenta gradvis blir sett ned frå første kvartal neste år. Prognosen indikerer no ein litt raskare nedgang gjennom 2025 enn frå førre pengepolitiske rapport. Det kan bety tre rentekutt neste år, med moglegheit for eit fjerde.

Økonomar: Lita moglegheit for kutt i år
Både avgjerda og grunngivinga var som venta, meiner sjeføkonom Kyrre M. Knudsen i Sparebank 1 SR-Bank.

Han meiner sentralbanksjefen framleis held ei ørlita opning for at det første rentekuttet kan komme før jul, ettersom inflasjonen har falle raskare enn venta. Men mest sannsynleg vil det dryge til mars, meiner han, og viser til den svake krona.

– Eg trur derimot at vi får heile fire rentekutt gjennom 2025, seier Knudsen.

Også NHOs sjeføkonom Øystein Dørum meiner kronekursen er grunnen til at Noregs Bank nøler med å kutte. Skal det bli aktuelt med rentekutt allereie før jul, må den underliggjande prisveksten vidare ned og krona må ikkje svekkje seg ytterlegare, påpeikar han.

– Noregs Banks standhaftigheit synest no primært å botne i eitt forhold: Faren for at for tidlege rentekutt kan trigge ein ny auke i prisveksten, skriv han i ein kommentar til renteavgjerda.

Mange norske bustadlånskundar vart nok skuffa med tanke på eit mogleg løft i kjøpekrafta inn mot jul, kommenterer Dørum.

– Heller ikkje i regjeringskontora blir det applaus av denne avgjerda, når ein i over eitt år har uttalt at ein fører ein økonomisk politikk for å få renta ned, noterer han.

– Framleis behov for å få prisveksten ned
Wolden Bache seier styringsrenta har bidrege til å kjøle ned norsk økonomi og å dempe prisveksten. Sjølv om inflasjonen har flata ut, har den underliggjande prisveksten ikkje falle like mykje. Kostnadene for bedriftene er framleis venta å vekse, og ei svakare krone vil bremse den vidare nedgangen.

Det er framleis behov for ein innstrammande pengepolitikk for å få prisveksten ned til målet innan rimeleg tid, heiter det i kunngjeringa frå Noregs Bank.

Om renta blir sett ned for tidleg, kan prisveksten bli liggjande over målet for lenge. På den andre sida kan høg rente bremse meir enn nødvendig, skriv dei vidare.

Noregs Banks komité for pengepolitikk og finansiell stabilitet erkjenner at det er uvisse om korleis norsk økonomi utviklar seg. Komiteen har lagt vekt på at prisveksten har falle, og at den over tid har vore lågare enn anslått.

– Det underliggjande inflasjonspresset kan vere svakare enn vi no legg til grunn. Dersom det blir utsikter til at prisveksten kjem raskare ned til målet eller vi får ei kraftigare oppbremsing i norsk økonomi, kan renta bli sett raskare ned enn vi no ser for oss, skriv komiteen.

-Tøft for bustadlånskundane
Året 2024 blir året med det høgaste rentenivået norske bustadlånskundar har opplevd på 15 år, noterer forbrukarøkonom Magne Gundersen i Sparebank 1.

Norges Eiendomsmeglerforbund er bekymra for at Noregs Bank ventar for lenge og påpeikar at bustadinvesteringane har falle dramatisk. Medan Huseierne påpeikar at mange nordmenn no slit med høg rente, samtidig som andre bukostnader aukar.

– Bustadlånsrenta vil halde fram med å vere over 6 prosent for veldig mange. Samtidig aukar andre bukostnader som kommunale avgifter, forsikring og vedlikehaldskostnader, seier Carsten Henrik Pihl, leiar for politikk, samfunn og berekraft i forbrukarorganisasjonen.

(©NTB)