Staten skal auke kompensasjon for statleg avgift

NPK-NTB-Marius Helge Larsen/NETT NO: I august sa fiskeriminister Marianne Sivertsen Næss at ho forsto fiskarkritikken mot stadig auke i CO2-avgifta fram til 2030. I dag kom svaret på kva ho vil gjere med det.

I forslaget til statsbudsjett, som kjem måndag, set regjeringa av 500,4 millionar kroner til CO2-kompensasjonsordninga for fiske i nære farvatn. Dermed blir ordninga auka med 153,6 millionar kroner, tilsvarande auken som vart gjord i CO2-avgifta i 2024.

– CO2-avgifta har ei hensikt, nemleg å få fleire over på grøne alternativ. Men når dei alternativa ikkje er på plass, kan vi ikkje dytte næringa over ende, seier fiskeriminister Marianne Sivertsen Næss (Ap) til NTB.

Manglar teknologi og infrastruktur

Regjeringa har gradvis auka CO2-avgiftene på drivstoff, og målet er å få bruken av diesel ned og erstatte det med andre løysningar slik at CO2-utsleppa blir redusert. Men fiskeriministeren seier at det er for tidleg for næringa å gå over til lågutsleppsfartøy no.

– Det finst ikkje teknologi som er moden eller tilgjengeleg. Og vi har heller ikkje ladeinfrastruktur på plass langs kysten. Derfor må vi gjere tiltak som sikrar lønnsemd og held i gang aktiviteten i kystsamfunna, våre, seier ho.

Næss påpeikar at fiskerinæringa er inne i ein krevjande periode, med lågare kvotar på torsk, sei, hyse og sild. I tillegg har utgiftene auka kraftig.

– Vi skal gjere det vi kan for å bidra til at fiskerinæringa kjem seg gjennom den krevjande tida, seier Næss.

– Er dette bidraget nok?

– Det må nok tenkjast breiare, for dette rammar hardt. Vi har allereie ulike tiltak som det blir jobba med, både kortsiktige og langsiktige. Men dette er altså eitt av fleire tiltak som skal bidra i ein krevjande situasjon.

– Trør vatnet
Senterpartiets næringspolitiske talsperson, Willfred Nordlund, seier næringa ønskjer å omstille seg.

– Men viss du ikkje har teknologi tilgjengeleg, så er det jo rart om du skal bli ramma av nye krav, seier han.

– Auka avgifter på drivstoff rammar jo fiskeriflåten hardt, særleg når du har kvotenedgang. Det kan føre til at du må gå lenger ut på havet for å få tak i den fisken du skal ha, påpeikar han.

Fiskeripolitisk talsperson i Arbeidarpartiet, Runar Sjåstad, avviser at dei har lagt bort intensjonane om å få til ei grøn omstilling også innanfor fiskeflåten.

– Vi tenkjer i mange spor. Men dette er på ein måte å trø vatnet i ein vanskeleg situasjon, der vi heller ikkje har teknologi og infrastruktur på plass, seier han.