Stor interesse for storsatsing frå Hofseth

Hofseth-konsernet si satsing på ein nye metode for å tine fisken, slik at den skal få «kaifersk» kvalitet, blir møtt med stor interesse under Seafood Expo Global i Barcelona denne veka. 

Den store sjømatmessa er ein møteplass for aktørar frå heile verda, og ein arena for å vise fram nye produkt og teknologi. 

Smaksprøver og demonstrasjon av «Icefresh»-metoden er ein sentral del av standen til Ålesund-selskapet på messa. 

– Vi opplever at det har vore veldig stor interesse. Vi har til eksempel hatt møter med potensielle partnarar frå Sør-Amerika , Australia, Frankrike, Belgia og Italia for å nevne nokre, fortel Anders Haugland til Nett No.

Opnar snart hub nummer tre i USA
Haugland har utvikla teknologien i selskapet Icefresh – som Hofseth kjøpte for nokre år sidan. I dag er han teknologidirektør i selskapet og den som har jobben med å sette ut i livet ein storstilt plan om hub-ar for tining av fisk over store delar av verda. 

Den første hub-en i Chicago har allereie vore operativ i over eit år, medan dei nettopp har opna ein ny i Los Angeles. Deretter står Miami for tur. 

– Ambisjonsnivået i USA er at vi skal vere fire timar unna 95 prosent av befolkninga. Vi er på god veg, seier Haugland. 

– Har full fart i USA
Kapasiteten ved alle USA-hub-ane blir trappa opp i løpet av året. Målet er at dei innan utgangen av 2026 skal kunne handtere eit volum på over 60 tonn fisk i døgnet. 

Sjølv om selskapet er spente på kor raskt veksten vil kome, lar dei ikkje ulike utspel frå president Donald Trump legge ein dempar på innsatsen. 

– Vi bygger og utviklar selskapet kvar dag og har full fart i USA. Amerikanarane bør få betre fisk i butikkane enn dei har i dag, og vi jobbar var dag for å bidra til det, seier Haugland. 

Planlegg etableringar i Europa og Asia
Å etablere tinehub-ar fleire plassar i verda står for tur deretter. 

– I Europa har vi ein hub i Hamburg og snart ein i Italia, i tillegg til andre som vi ikkje vil avsløre rett enno. I Asia har vi testeiningar på fleire lokasjonar - i Tokyo, Sør-Korea, Australia og Shanghai, held Haugland fram.

Når alt litt til rette for det, er planen å starte bygging av hub-ar også her. 

Icefresh-metoden er som store kjøleskap der ein har moglegheit til å tine kontrollert og effektivt.

I tillegg er det veldig fleksibelt. I éin av hub’ane kan ein tine alt frå éin boks til 40 tonn. Det gjer at dei kan tine ulike fiskeartar og forpakningar, ut frå etterspurnaden hos kundane.

MMC First Process blant leverandørane
MMC First Process er ein av partnarane i Hofseth-satsinga, som også er på plass på messa i Barcelona. 

Utstyrsleverandøren med avdelingar på Digernes og i Herøy har laga tinehub-en som nyleg blei teke i bruk i Los Angeles. 

– Det var veldig mange som var nysgjerrige på kvaliteten under prøvesmakinga, sidan det dreiar seg om fryste produkt. Men den er fantastisk god, og står ikkje tilbake for fersk fisk, seier Per Helge Devold, som marknads- og kommunikasjonsansvarleg i MMC First Process, til Nett No. 

– Er toneangivande i bransjen
Over 100 norske utstillarar er på plass under Seafood Expo Global, og ein stor del av dei kjem frå Nordvestlandet. 

– Ein kjenner på ein viss grad av stoltheit når ein ser kor mange folk som er her frå regionen, og som er toneangivande i bransjen, seier Devold. 

Også fiskeri- og havminister Marianne Sivertsen Næss er mellom dei som deltek på sjømatmessa. Onsdag hadde ho dialogmøte med ein rekke aktørar i bransjen, mellom anna Jangaard Export, Coast Seafood og oppdrettsselskapet Ode, frå Nordvestlandet.