Store dimensjonar på oppdrettsanlegget

I desse dagar er Salmon Evolution i full gong med å montere dei første kara ved oppdrettsanlegget på Indre Harøy. Bilde frå arbeidet viser tydeleg dei enorme dimensjonane på landanlegget som skal bli mellom dei største i Europa.

Anlegget vil vere først i verda til å ta i bruk nettopp denne produksjonsløysinga og det er rekna ut at energiforbruket per kilo matfisk, er 30 prosent lågare enn samanliknbar teknologi.

Første slakting seint neste år
Målet er å produsere kring 9000 tonn laks årleg når første byggetrinn er ferdig. Planen er å ha første smolt i anlegget mot slutten av året, og at første slakting skjer mot slutten av 2022.

To vidare byggetrinn er planlagt og fullt utbygd skal anlegget produsere 31.500 tonn laks i året. Selskapet har tidlegare opplyst at dei kan bygge ut langt meir på staden om dei ønsker, og minst doble produksjonen.

Leverandørar og eigarar på Sunnmøre
Fleire leverandørar frå Sunnmøre er med på prosjektet. Artec Aqua i Ålesund er totalleverandør for anlegget, medan Møre Trafo i Sykkylven skal levere 11 transformatorar.

Salmon Evolution ble tatt opp til notering på Oslo Børs i september, med fleire investorar frå Nordvestlandet på eigarsida.

Også ved den siste kapitalutvidinga på 500 millionar i mars var mellom anna Ronja Capital (Roger, Anja og Robin Halsebakk), Rofisk (Odd Einar Sandøy), Frode Håkon Kjølås og Peder Stette med vidare.