Store skilnadar for skipsdesignarane

Dei aller fleste skipsdesignselskapa auka inntektene frå 2023 til 2024, men berre Salt Ship Design og Skipsteknisk fekk ein vesentleg auke i lønsemda. Det går fram av tabellen under.

Deira auke i overskotet meir enn vog opp for ei kraftig resultatforverring hos Ulstein Design & Solutions, som fekk sitt svakaste resultat sidan åra 2017 og 2018.

Resultatet før skatt i høve til driftsinntektene auka frå 7,1 prosent i 2023 til 8,1 prosent i 2024 for heile bransjen.

Større aktivitet
Bransjen auka inntektene med 42 prosent frå 2023 til 2024. Inntektene i fjor var også 24 prosent over 2022-nivået. 

Veksten fortel om eit auka aktivitetsnivå etter eit magert 2023.

– 2023 blir eit vesentleg tristare år enn 2022. Det har vore lite kontraktar sidan i fjor sommar, sa styreleiar og medeigar Egil Sandvik i Salt Ship Design i 2023.

2024 gav derimot eit oppsving, og aktivitetsnivået er godt også i år, fortel han.

Oppsving frå offshore
Skipsteknisk i Ålesund har aldri hatt høgare inntekter i nominelle kroner enn i 2024. Førre inntektsrekord var i 2018, med 172 milionar kroner.

Lønsemda auka også, og driftsmarginen (driftsresultat i prosent av driftsinntekt) er blant dei høgare selskapet har hatt dei siste 10 åra.

Det er ny og høgare aktivitet i marknaden for skip til offshore og anna energibransje-aktivitet til havs som er årsak til inntektsveksten i fjor. Den auken meir enn veg opp for at det er mindre å gjere i fiskebåtmarknaden, ifølgje årsmeldinga for 2024.